Рӯзҳои наздик дар ҷумҳурӣ боришоти зиёд, раъду барқу шамоли сахт дар назар аст ва Кумитаи ҳолатҳои фавқулода аҳолиро огоҳ мекунад, ки ба он омодагӣ гиранд.
Бино ба маълумоти обуҳавошиносон, ки Кумитаи ҳолатҳои фавқулода ба он такя мекунад, аз 30 март то 1 апрел дар саросари кишвар обуҳавои номусоид пешбинӣ мешавад.
Давоми ин рӯзҳо дар водиҳо боришоти зиёди борон ва дар доманакӯҳҳо боридани барф дар назар буда, вазиши шамол аз самти ғарб то 17-22 метр дар як сония мерасад.
Кумитаи ҳолатҳои фавқулода сокинон ва меҳмонони ҷумҳуриро огоҳ мекунад, ки дар ин рӯзҳо ҳушёриро аз даст надиҳанд, зеро раъду барқу оташак аз он аз эҳтимол дур набуда, ғайр аз ин, дар дарёҳои Қизилсӯ, Ёхсу ва Оби Хингоб, ҳамчунин рӯдхонаҳои қаторкӯҳи Ҳисор хатари болоравии сатҳи об вуҷуд дорад.
Дар роҳҳои мошингарди мавзеи кӯҳистони ҷумҳурӣ фаромадани селу тарма ва сангрезиҳо имкон дорад.
