Маҷаллаи «Таймс» дар бораи кушта шудани собиқ фармондеҳи Дастаи таъиноти махсуси милиса (ОМОН)-и ВКД Тоҷикистон Гулмурод Ҳалимов маълумот дод, ки ба сафҳои Давлати исломӣ пайваста буд.
Тибқи маълумоти нашрия, ӯ дар ҷараёни зарбаҳои ҳавоӣ ба қисмати ғарбии шаҳри Мавсили Ироқ ба ҳалокат расидааст.
Нашрия ӯро яке фармондеҳони воломақоми созмони террористии Давлати исломӣ унвон карда, қайд мешавад, ки ин кӯшиши сеюми аз байн бурдани ӯ буд.
Як манбаъ ба «Таймс» хабар додааст, ки Гулмурод Ҳалимов дар хадамоти махсуси ИМА давраҳои омӯзиширо гузашта, дар воҳидҳои нерӯҳои мусаллаҳи Тоҷикистон хизмат мекард.
Гуфта мешавад, ӯ дар Сурия ва Ироқ ба сафҳои террористон пайваста, тарҳрезии нақшаҳои ҳимояи муҷоҳидон дар шаҳри Мавсил ва роҳандозии инфиҷори автомашинаҳо алайҳи нерӯҳои эътилофро бар дӯш дошт.
Ёдрас мекунем, ки фармондеҳи ОМОН ВКД Тоҷикистон полковник Гулмурод Ҳалимови 40-сола ахири моҳи апрели соли 2015 бедарак шуд. Ӯ дар ҷойи кор пайдо нашуда, макони будубошаш ҳам ба касе маълум набуд. Расо баъди як моҳ полковник аз худ дарак дод. Дар шабака навори видеоии 12-дақиқаинаи муроҷиати Ҳалимов бо забони русӣ интишор шуд.
Дар ин навор ӯ ҳикоят кард, ки ба нишони эътироз алайҳи тарзу усулҳои кор дар ВКД ба сафи «Давлати исломӣ» пайвастааст. Ӯ ҳамчунин доир ба омодагӣ ва омӯзишаш дар давраҳои таълимӣ дар ИМА низ маълумот дода буд.
Қобили зикр аст, ки нисбат ба полковник дар Тоҷикистон мутобиқи якчанд моддаи Кодекси ҷиноӣ парвандаи ҷиноӣ боз шуда, ӯ ба ҷустуҷӯи байнулмилалӣ эълон шудааст.
