Донишҷӯёни тоҷики Донишгоҳи Осиёи Марказӣ (ДОМ) ҳозир нашудаанд, ки мувофиқи талаби эътирозгарон дар Норин ба зону зананду узрхоҳӣ кунанд.
Бино ба иттилои хабаргузории «Озодагон», Рустам Мирзоширинов, корманди ин муассиса ва яке аз шоҳидони ҳодиса дар шарҳи қазия гуфт, “новобаста ба эҳсосот ва ғазаби 300 кас, донишҷуёни тоҷик мардона изҳор доштанд, ки онҳо танҳо барои Худо ба зону меистанд ва сар хам мекунанд”.
Ба гуфтаи ин шоҳид дар пайи пофишориҳои эътирозгарони эҳсосӣ ва розӣ нашудани ҷавонони тоҷик барои задан ба зону, як муаллими амрикоӣ ҷиҳати ҷилавгирӣ аз шиддати вазъ ба зону нишасту узрхоҳӣ кард: “Нафаре, ки дар навор ба зону нишаст, муллими амрикоӣ буд, ки аз барои донишҷуён тарсида, ки мабодо байнашон ҷанг нашавад, аз номи тамоми донишҷӯён ба зону нишаст”.
Ба навиштаи Мирзоширинов дар шабакаи Фейсбук, пешвоёни афроди эътирозгар, ки рӯзи гузашта даст ба ин кор заданд, имрӯз ба Донишгоҳи Осиёи Марказӣ омада, узрхоҳӣ кардаанд: “Онҳо низ иштибоҳашонро фаҳмиданд ва феълан созиш ҳосил шуд”.
ИЗОБРАЖЕНИЕ
Ахиран мақомоти милисаи Қирғизистон низ ба таври оммавӣ ба зону шинондани донишҷӯёни Донишгоҳи Осиёи Марказӣ дар Норинро рад карда, изҳор доштаанд, ки танҳо як устоди донишгоҳ ба зону нишаста буд. Ба гуфтаи манбаъ ба далели камбуди ҷой бархе аз ҳозирин, аз ҷумла ҷавонони қирғиз дузону нишаста буданд, аммо ба истиснои як муаллим дигар касе ба зону зада, узрпурсӣ накардааст.
Бо вуҷуди ин фаъолони ҷомеаи шаҳрвандӣ аз мақомоти Тоҷикистон талаб доранд, ки ин иқдоми ҷавонони қирғизро бепосух нагузоранд ва қазияро ҳаматарафа таҳқиқ кунанд.
ИЗОБРАЖЕНИЕ
Ин дар ҳолест, ки рӯзи 8-уми июн расонаҳои Қирғизистон иттилоъ доданд, ки ҷавонони қирғиз донишҷӯёни тоҷики Донишгоҳи Осиёи марказии воқеъ дар шаҳри Норини Қирғизистонро маҷбур кардаанд, ба зону зада, узр бихоҳанд.
Расонаҳои қирғизӣ навореро нашр карда ва гуфтаанд, гуруҳе аз ҷавонони шаҳри Норин 8 июн бо талаби муҷозоти омилони ҳодисаи 27 май дар бинои донишгоҳ таҷамӯъ кардаанд. Ба иттилои расонаҳо, 27 май дар мусобиқаи баскетбол, ки дар Донишгоҳи Осиёи Марказӣ миёни донишгоҳҳо ва дастаҳои ҷавонони маҳаллӣ доир шуд, байни бозигарону мухлисон занозанӣ шудааст. Муътаризон донишҷӯёни тоҷикро омили ин занозанӣ медонанд. Дар наворҳое, ки расонаҳо нашр кардаанд, дида мешавад, ки Амонбой Кайипов, волии вилояти Норин ва кормандони пулис ҳам онҷо ҳузур дорад. Аммо ҷавонони маҳаллӣ на ба волӣ ва на ба узрхоҳии масъули донишгоҳ аҳамият надода, ба навиштаи расонаҳо, донишҷӯёни тоҷик ва кормандони донишгоҳро маҷбур кардаанд, зону зада, бахшиш пурсанд. Онҳо ин лаҳзаҳоро дар телефонҳояшон сабт карда ва қарсак мезананд. Расонаҳо менависанд, муътаризон танҳо баъди ин бинои донишгоҳро тарк кардаанд.
Нурлан Сарчаев, сардори Раёсати умури дохилии вилояти Норин ба нашрияи "Турмуш" гуфтааст, пулис ба баррасии ин моҷаро шурӯъ карда ва қарор аст, 10 июн бо ҷавонони маҳаллӣ мулоқот доир шавад.
