Президенти Тоҷикистон Эмомалӣ Раҳмон субҳи имрӯз бо сафари дурӯзаи корӣ ба пойтахти Арманистон – шаҳри Ереван раҳсипор шуд. Ин сафар бо даъвати президенти Арманистон Серж Саргсян сурат мегирад.
Бино ба иттилои хадамоти матбуоти сарвари давлат, дар ин сафар Эмомалӣ Раҳмонро вазири корҳои хориҷӣ, ёрдамчиёни Президенти ҶТ оид ба масъалаҳои робитаҳои хориҷӣ ва оид ба масъалаҳои ҳуқуқӣ, вазирони рушди иқтисод, тандурустӣ ва ҳифзи иҷтимоии аҳолӣ, маориф ва илм, прокурори генералӣ, президенти Академияи илмҳо, раиси Кумитаи давлатии сармоягузорӣ ва идораи амволи давлатӣ, раиси Кумитаи кор бо ҷавонон ва варзиш, сардори Хадамоти алоқа ва дигар шахсони расмӣ ҳамроҳӣ мекунанд.
Қобили зикр аст, ки муносибатҳои дипломатии Ҷумҳурии Тоҷикистон бо Ҷумҳурии Арманистон 12 октябри соли 1992 роҳандозӣ шудаанд.
Барои муносибатҳои Тоҷикистону Арманистон эътимоди мутақобила, мувофиқат ва ё наздикии мавқеъ оид ба масъалаҳои алоҳидаи рӯзмарраи байналмилалӣ ва минтақавӣ хос мебошанд.
Мулоқотҳои кории роҳбарони ду давлат ба таҳкими муносибатҳои дуҷониба мусоидати назаррас мерасонанд. Рӯзҳои 2 – 3 апрели соли 2002 сафари расмии Президенти Ҷумҳурии Арманистон Роберт Кочарян ба Ҷумҳурии Тоҷикистон баргузор гардид. Рӯзҳои 25 – 26 ноябри соли 2003 сафари расмии ҷавобии Президенти Ҷумҳурии Тоҷикистон Эмомалӣ Раҳмон ба Ҷумҳурии Арманистон доир гардид.
Дар рафти сафарҳои зикргардида як қатор санадҳо, ки муҳимтарини онҳо Аҳдномаи дӯстӣ ва ҳамкорӣ байни Ҷумҳурии Тоҷикистон ва Ҷумҳурии Арманистон ба ҳисоб меравад, инчунин, ҳуҷҷатҳои байниҳукуматӣ ва байниидоравӣ дар соҳаҳои ҳимояи сармоягузорӣ, илм, техника, иттилоот, сохтмон ва ҳифзи табиат ба имзо расиданд.
Заминаи шартномавию ҳуқуқии муносибатҳои дуҷонибаро зиёда аз 20 ҳуҷҷат ташкил медиҳад, ки онҳо масъалаҳои гуногуни ҳамкориҳои дуҷонибаро дар соҳаҳои иқтисодиёт, тиҷорат, кишоварзӣ, тандурустӣ, фарҳанг ва илму маориф дарбар мегирад.
Бино ба маълумоти Агентии омори назди Президенти ҶТ, соли 2016 ҳаҷми муомилоти мол миёни Тоҷикистону Арманистон каме бештар аз 269 ҳазор долларро ташкил додааст. Соли гузашта ҳаҷми воридоти мол аз Арманистон ба Тоҷикистон 5 ҳазор доллар ва содироти маҳсулот аз Тоҷикистон ба Арманистон беш аз 264 ҳазор долларро ташкил дод.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
