Дар як қатор шаҳрҳои Русия рӯзи 26 март тазоҳуроти зиддикоррупсионӣ баргузор шуда, дар онҳо аз даҳҳо то чанд ҳазор нафар иштирок доштанд. Мардум ҳатто дар шаҳрҳое низ тазоҳурот карданд, ки мақомот иҷозат надода буданд.
Бино ба иттилои сомонаи Лоиҳаи хабарии Осиёи Марказӣ, дар Москва тазоҳуроти худсарона дар шакли қадамзанӣ баргузор шуда, бино ба хабарҳо, дар он аз 8 то 20 ҳазор одам иштирок дошт. Пулис зидди фаъолон аз нерӯ кор гирифта, садҳо иштирокчии тазоҳуротро боздошт кард.
Гуфта мешавад, миёни боздоштшудаҳо дар пойтахти Русия мухолифи машҳури Кремл Алексей Навалний низ ҳаст. Ӯ то содир шудани қарори додгоҳ дар боздоштгоҳ хоҳад монд. Кормандони Бунёди мубориза бо фасод, ки рафти тазоҳуротро дар саросари Русия ба таври мустақим дар интернет нишон медоданд, низ ба шуъбаи пулис интиқол ёфтаанд.
Ба иттилои манбаъ, коргоҳи бунёди мазкур дар доираи парвандае бо моддаи "Барангехтани адоват ё кина" кофтукоб шудааст.
Зикр мегардад, ки ҳамчунин пулис барои баргузор кардани тазоҳурот дар Петербург, Тула, Краснодар, Нижний Новгород, Южно-Сахалинск, Тамбов, Самара, Хабаровск, Екатеринбург, Липетск ва як қатор шаҳрҳои дигари Русия монеа эҷод кардааст.
Қайд мешавад, ки Алексей Навалний аз ҷонибдорони худ даъват кардааст, то дар тазоҳуротҳои зиддикоррупсионии марбут ба фасодкории эҳтимолии сарвазири Русия Дмитрий Медведев иштирок кунанд. Худи сарвазир Медведев то ба ҳол ба ин айбҳо вокуниш нишон надодааст.
Дар ҳамин ҳол, бино ба маълумоти Reuters, ИМА боздошти садҳо нафар тазоҳургарон дар Русияро маҳкум намуда, ин амалро «таҳқири арзишҳои демократӣ» номидаанд.
