Акнун бо арзу шикоят муроҷиат кардан ба Агентии «Тоҷикстандарт» доир ба пешниҳоди маҳсулоти пастсифату муҳлати истифодаашон гузашта осонтар шуд. Арзу шикояти худро метавон дар шакли электронӣ тариқи замимаи «Стандарт» ирсол намуда, ҳузури шахсӣ зарур нест.
Тавре ба «Азия-Плюс» роҳбари ТҶ «Пешсаф» Руслан Шукуров хабар дод, замимаи «Стандарт» барои платформаҳои Андроид ва IOS таҳия шуда, онро метавон дар Play Market ё дар AppStore нусхабардорӣ кард.
Ҳамин тариқ, тавассути замимаи «Стандарт» ирсоли муроҷиат ба «Тоҷикстандарт» имкон дошта, дар бахши «Муроҷиатҳои ман» метавон аз ҷараёни баррасии муроҷиат худ огаҳӣ пайдо намуд.
«Дар ҳамдастӣ бо «Тоҷикстандарт» ба мо таҳияи механизми барои аҳолӣ муҳими муроҷиати шаҳрвандон муяссар гардида, айни замон мо аллакай мисолҳое дорем, ки тавассути ин замима ҳуқуқҳои поймолшудаи шаҳрвандон барқарор карда шуданд», – қайд кард Руслан Шукуров.
Саҳифаи асосии замимаи нусхабардоришуда чунин аст:
ИЗОБРАЖЕНИЕ
Гуфта мешавад, барои хизматгузорӣ ба ин барнома «Тоҷикстандарт» як корманди алоҳида ҷудо карда, ӯ ба қабул ва ирсоли муроҷиатҳо ба сохторҳои дахлдори агентӣ масъул аст.
Ҳамчунин зикр мегардад, ки барои қабули муроҷиатҳои электронии шаҳрвандон сатҳи зарурии омодагии техникӣ ва касбӣ таъмин гардида, ҷиҳати баррасии онҳо дар фурсатҳои кӯтоҳтарин шароит фароҳам оварда шудааст.
Муроҷиат ё арзу шикоятро ҳамзамон метавон тариқи сомонаи «Тоҷикстандарт» – www.standard.tj низ ирсол кард.
