Як иштибоҳи доиранавозони гурӯҳи “Очаҷонҳо” ҳангоми истиқболи президент дар ноҳияи Хуросони вилояти Хатлон сабаби барканории раиси идораи кор бо занони ин ноҳия шуд.
Бино ба маълумоти Радиои Озодӣ, ин даста дар варзишгоҳи Хуросон ба истиқболи президент бояд оҳанги зарбиро иҷро мекард. Зоҳиран баъзе навозандаҳо зери бори эҳсосот натавонистанд мусиқиро якмаром ва аз рӯи қоида иҷро кунанд. Дар натиҷа, иштибоҳ дар иҷрои мусиқии зарбӣ ба ҳозирин аён шуд ва боис ба интиқоди масъули барнома гардид.
Зиёда Саломова, мудири идораи кор бо занон ва оилаи ҳукумати ноҳияи Хуросон он рӯз масъули таҳияи барномаи ҳунарии дастаи “Очаҷонҳо” буд. Мақомот гуфтаанд, ки Зиёда Саломова бо хоҳиши худ ба истеъфо рафт. Вале худи ӯ ва огоҳони вазъ мегӯянд, истеъфои Саломова баъд аз як иштибоҳ дар тақдими оҳанги дастаи ҳунарӣ сурат гирифтааст.
Худи Зиёда Саломова дар сӯҳбати телефонӣ бо Радиои Озодӣ пайванди барканории ӯ бо иштибоҳи занони доиранавозро тасдиқ карда, иброз доштааст, ки аз чунин ранг гирифтани кор зиёд нороҳат ва аз касе ҳам домангир нест, ҳарчанд, ба гуфтаи вай, дар ин кор бояд раҳбари дастаи занони доиранавозон ҷавобгӯ мебуд, на ӯ.
ИЗОБРАЖЕНИЕ Зиёда Саломова, аллакай собиқ мудири идораи кор бо занон ва оилаи ҳукумати ноҳияи Хуросон
Гуфта мешавад, дар ноҳияи Хуросон ҳудуди 55 ҳазор зан зиндагӣ мекунад. Дар рӯзи сафари президент ба ин ноҳия беш аз 1000 зану духтар дар барномаҳои мухталифи фарҳангиву ҳунарӣ ва истиқболи президент ҷалб шуданд.
