Сафири Ҷопон дар Тоҷикистон Ҳаҷимэ Китаока, муовини раиси Кумитаи кор бо ҷавонон ва варзиши назди ҳукумати ҶТ Дилшод Назаров, ёвари сардори Котиботи Ситоди бозиҳои Олимпӣ ва Параолимпӣ Рёсуке Андо ва котиби Генералии Федератсияи дзюдои Тоҷикистон Ширинҷон Мамадсафоев дар маросими бомуваффақ анҷом ёфтани лоиҳаи “Таъмини таҷҳизот барои марказҳои варзишии дзюдо” ширкат варзиданд.
Лоиҳаи мазкур бо маблағи умумии 90,906 доллари ИМА тавассути кӯмакҳои бебозгашти фарҳангии Ҳукумати Ҷопон ва ҳамчун қисми таркибии барномаи “ВАРЗИШ БАРОИ ФАРДО” иҷро карда шуд.
Лоиҳаи “Таъмини таҷҳизот барои марказҳои варзишии дзюдо” хоса барои фароҳам овардани шароити муносиб барои варзишгарони ҷавони дзюдо ва беҳсозии ҳолати толорҳои барои мусобиқа таҳия гаштааст.
Тибқи лоиҳа беш аз 1900м2 “татами” барои “Мактаби ҷумҳуриявии маҳорати олии варзишӣ оид ба намудгохи гӯштин” шаҳри Душанбе, Кохи варзишии Хоруғ, Маркази омӯзишии дзюдои Қайроқум ва Толори варзишии дзюдо ва гӯштин дар Хуҷанд ҷудо карда шуд. Насби татамиҳои нав заминаи фаъолияти Федератсияи дзюдоро дар саросари кишвар беҳтар менамояд.
Тавассути барномаи Ҷопон “ВАРЗИШ БАРОИ ФАРДО” як қатор лоиҳаҳо дар саросари ҷаҳон амалӣ мешаванд. Барнома ба густариш ва ҳавасманд гардондани варзиш, минҷумла ҳаракати Олимпӣ ва Паралимпӣ барои одамони насли гуногун, аз ҷумла ҷавонони ояндасоз равона шудааст.
Барнома дар давраи солҳои 2014 – 2020 амалӣ гашта, беш аз 10 миллион нафарро дар зиёда аз 100 кишвари дунё дар бар мегирад. Босамар ва бомуваффақ амалӣ намудани барномаи “ВАРЗИШ БАРОИ ФАРДО” то Бозиҳои Олимпӣ ва Паралимпии Токио 2020 аз шумули ӯҳдадориҳои Ҳукумати Ҷопон мебошад.
