Ронандаҳои микроавтобусҳои хурди мусофирбар (маршруткаҳо)-и шаҳри Душанбе дигар ба манъи воситаи нақлиёт бо талаби мусофир ҳуқуқ надошта, ба онҳо дастур дода шудааст, ки танҳо дар истгоҳҳо автомашинаро манъ кунанд. Ин қарор аз ҷониби Шуъбаи БДА шаҳри Душанбе қабул шудааст.
Тавре ба «Азия-Плюс» як манбаъ аз Шуъбаи БДА шаҳри Душанбе дар ин робита хабар дод, тақвияти назорат дар ин самт ба бартараф кардани ҳолатҳои танбашавии воситаҳои нақлиёт дар роҳҳои пойтахт ва ҳамчунин риояи меъёрҳои қоидаҳои ҳаракат дар роҳ равона шудааст.
«Ин чизи нав нест, чунин қоидаҳо вуҷуд доранд, вале аз ин ба баъд мо риояи онро ҷиддӣ назорат мекунем», – гуфтанд дар Шуъбаи БДА пойтахт.
Бино ба иттилои манбаъ, талаботи қоидаҳои ҳаракат дар роҳ дар мавриди манъи нақлиёти ҷамъиятӣ танҳо дар истгоҳҳо дар бисёр кишварҳои ҷаҳон мавриди амал қарор дорад. «Чунин қоидаву тартибот замони шӯравӣ дар Душанбе низ риоя мешуд», – хотиррасон кард манбаъ.
Зимнан зикр гардид, ки барои ба воситаи нақлиёти ҷамъиятӣ шинонидан ва фаровардани мусофирон дар ҷойҳои пешбининашуда, яъне ғайр аз истгоҳҳо, ронандагони маршруткаҳо ба маблағи аз 25 то 50 сомонӣ ҷарима мешаванд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
