Дар шаҳри Доҳаи Қатар пеш аз Чемпионати Осиё оид ба варзиши сабук ҷаласаи Конгресси Федератсияи варзиши сабуки Осиё доир гардид.
Бино ба иттилои дафтари матбуоти Кумитаи миллии олимпии Тоҷикистон, дар ҷаласа Доҳлан Ҳамади қатарӣ дигарбора президенти Федератсияи варзиши сабуки Осиё интихоб гардида, то соли 2023 ин ниҳоди қоравиро роҳбарӣ хоҳад кард.
Гуфта мешавад, дар ҷаласа, ҳамчунин ноибони президент, аъзои Кумитаи иҷроия ва дигар ниҳодҳо интихоб гардиданд.
Бо истинод ба маълумоти ТВ “Варзиш” қайд мешавад, ки аз ҷумла, варзишгари маъруфи кишвар, чемпиони Бозиҳои олимпӣ, раиси Федератсияи варзиши сабуки Тоҷикистон Дилшод Назаров раиси Федератсияи варзиши сабуки Осиёи Миёна интихоб шуд. Федератсияи варзиши сабуки Осиё Дилшод Назаровро, инчунин раиси Комиссияи варзишгарон интихоб намуд.
Зимнан зикр мегардад, ки бо дастгирии роҳбарони федератсияҳои варзиши сабуки қитъаи Осиё ба Дилшод Назаров ҷоизаи “Беҳтарин гурзандози Осиё” тақдим гардид.
Ёдрас мекунем, ки Дилшод Назаров рӯзҳои 21-24 апрел дар мусобиқаи чемпионати навбатии Осиё дар Доҳа иштирок мекунад.
Тавре аз Кумитаи кор бо ҷавонон ва варзиши ҷумҳурӣ хабар доданд, ба ҷуз Дилшод Назаров, дар мусобиқаи Чемпионати Осиё оид ба варзиши сабук Тоҷикистонро боз панҷ нафари дигар намояндагӣ мекунад: Кристина Пронженко (давидан ба масофаи 400 метр бо монеъаҳо); Одилшо Исматов (давидан ба масофаи 800 метр), Алишер Пӯлодов (давидан ба масофаи 400 метр), Григорий Дерипаскин (давидан ба масофаи 400 метр) ва Гулсунбӣ Шарифова (давидан ба масофаи 200 метр).
Дар Чемпионати навбатии Осиё оид ба варзиши сабук иштироки беш аз 1 ҳазор нафар намоядагони 45 кишвари қора дар назар аст, ки аз рӯи 21 навъи ин варзиш қувваозмоӣ мекунанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
