Президенти Тоҷикистон Эмомалӣ Раҳмон дар робита ба садамаи ҳавопаймо дар фурудгоҳи Шереметевои Маскав имрӯз ба Президенти Федератсияи Россия Владимир Путин барқияи тасаллият ирсол намуд.
Бино ба иттиллои АМИТ “Ховар”, дар барқияи Эмомалӣ Раҳмон зикр мешавад, ки “Хабари ба амал омадани ҳолати фавқулода ҳангоми фуруди ҳавопаймои мусофирбар дар фурудгоҳи Шереметево, ки сабаби ҳалок шудани даҳҳо нафар шаҳрвандон гардид, моро сахт андӯҳгин намуд”.
“Дар робита ба ин фоҷеа тасаллияти амиқи худро ба Шумо ва тамоми мардуми дӯсти Россия иброз намуда, хоҳишмандам эҳсоси ҳамдардии моро ба наздикону пайвандони фавтидагон расонед», – изҳори ҳамдардӣ мешавад бар барқия.
Ёдрас мекунем, ки бар асари садамаи ҳавопаймои Sukhoi Superjet-100-и ширкати “Аэрофлот” дар фурудгоҳи Шереметевои шаҳри Маскав 41 нафар ба ҳалокат расид. Аз 78 нафар шахсони дар ҳавопаймо қарордошта 37 нафар – 33 мусофиру 4 аъзои сарнишинон зинда мондаанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
