Чор нафар блогерони тоҷик барои гузоштани навори видео бо номи “Барон ва Рустам, рейди фоҳишаҳо дар трасса” дар YouTube боздошт шуданд.
Навори ба истилоҳ блогерон бобати дар ҳудуди шаҳри Душанбе ба фоҳишагӣ даст задани занону духтарон мавриди вокуниш ва интиқоди шадиди корбарони шабакаҳои иҷтимоӣ қарор гирифта, ба муроҷиати занону духтарон ба Раёсати ВКД дар шаҳри Душанбе боис гардид ва муроҷиаткунандагон хостори андешидани чораҳои қонунӣ нисбати таҳиякунандагон ва пахшкунандагони навори мазкур дар шабакаи Интернет шудаанд, хабар медиҳад дафтари матбуоти РВКД Душанбе.
“Воқеан таҳиякунандагони ин навор меъёрҳои ахлоқиро риоя накарда, дар баробари ошкорнамоии шахсияти онҳо ҳамзамон шаъну шарафи занону духтаронро бо ин роҳ паст задаанд”, – омадааст дар маълумот.
Тибқи маълумоти мақомоти милитсия, дар баробари блогерон ҳамчунин ду нафар барномасоз-танзимгарони навори видео низ боздошт шудаанд.
Гуфта мешавад, боздоштшудагон инҳоянд: блогерон – Беҳрӯз Шарифии 27-сола ва Рустам Ашӯрови 30-сола; барномасоз-танзимгарон – Шаҳриёр Ҷалилови 24-сола ва Юсуфҷони Давлатмуроди 19-сола.
Қайд мешавад, ки нисбати боздоштшудагон тибқи муқаррароти моддаи 144 Кодекси ҷиноятии ҶТ (Ғайриқонунӣ ҷамъ ва паҳн кардани маълумот оид ба ҳайёти шахсӣ), парвандаи ҷиноятӣ оғоз ва тафтишоти пешакии он аз рӯи тобеият дар мақомоти Прокуратураи шаҳри Душанбе ба роҳ монда шудааст.
Дар ин модда ба сифати ҷазо корҳои ҳатмӣ ба муҳлати аз 120 то 180 соат ё ҷарима ба андозаи аз 200 то 500 нишондиҳанда барои ҳисобҳо ё бо корҳои ислоҳӣ ба муҳлати то 1 сол ё ҳабс ба муҳлати то 4 моҳ пешбинӣ шудааст.
Дар маълумот зикр мегардад, ки нафароне, ки худро блогер медонанду бо ин роҳ мехоҳанд маблағ ба даст оваранд, бояд меъёрҳои ахлоқиро риоя намуда, дар доираи қонун фаъолиятро ба роҳ монанд.
“Илова бар ин, дар навори мазкур хусусияти тарғиботии фоҳишагӣ ва тарзу усулҳои хизматрасонии кирдорҳои ғайрихлоқӣ ҷойгир карда шуда, дар он алфози қабеҳ, дашному ҳақорат, ки ба зеҳни истифодабарандагону тамошобинон таъсири манфӣ мерасонад, истифода ва нашр гардидааст”, – таъкид мешавад дар маълумот.
Ҳамчунин қайд мешавад, ки дар робита ба масъалаи мазкур Раёсати ВКД дар шаҳри Душанбе иттилоъ медиҳад, ки дар асоси нақшаи муштарак милитсияи пойтахт дар якҷоягӣ бо дигар мақомотҳои ҳифзи ҳуқуқ доир ба пешгирии фоҳишагӣ, танфурушӣ ва дигар кирдорҳои ғайриахлоқӣ дар ҳудуди пойтахт пайваста рейду амалиётҳои пешгирикунандаро баргузор намуда, тибқи муқаррароти қонунгузории кишвар нисбати занони сабукпо муҷозоти қонунӣ таъин карда мешаванд.
Таъкид мешавад, ки аммо бо мақсади ҳифзи ҳуқуқ, озодӣ ва шаъну шарафи онҳо руйхат, ному насаб ва расму навори амалиётҳои баргузоргардида расонаӣ карда нашуда, танҳо барои корбарии мақомотҳои дахлдор истифода бурда мешавад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
