Мунтахаби футболи наврасони Тоҷикистон (U-16) соати 2-и имшаб аз Дубай ба Душанбе бармегардад.
Федератсияи футболи Тоҷикистон ҳамаи мухлисон ва дӯстдорони футболро ба пешвози гарму самимонаи онҳо, ки бо ҳунарнамоии худ дар мусобиқаи интихобии Чемпионати Осиё-2020 дар Урдун ба тамоми аҳолии мамлакат эҳсоси хушу гуворо ва фараҳмандӣ бахшиданд, даъват мекунад.
Қобили зикр аст, ки ин мусобиқа аз 14 то 22 сентябр дар Урдун баргузор шуд. Футболбозони мо 4 вохӯрӣ гузарониданд ва дар ҳамаи бозиҳо бо ҳисоби калон ғолиб гардида, 12 имтиёзи имконпазир ба даст оварданд.
Ба даври финалии Чемпионати Осиё, ки аз 16 сентябр то 3 октябри соли 2020 дар Баҳрайн доир мегардад, ғолибони 11 гурӯҳ – Тоҷикистон, Ҳиндустон, Эрон, Арабистони Саудӣ, Қатар, Амороти Муттаҳидаи Араб, Чин, Австралия, Кореяи Шимолӣ, Ҷопон ва Кореяи Ҷанубӣ роҳхат гирифтанд.
Чор дастаи зинаи дуюм бо натиҷаҳои беҳтарин байни гурӯҳҳо – Яман, Индонезия, Ӯзбекистон ва Уммон низ роҳхати Чемпионати Осиёро ба даст оварданд.
Ёдрас мекунем, ки мунтахаби футболи наврасони Тоҷикистон бори чорум ба даври финалии Чемпионати Осиё роҳхат гирифт. Дастаи наврасони кишвар солҳои 2006, 2010 ва 2018 дар ин мусобиқот ширкат варзиданд. Натиҷаи беҳтарини онҳо медали нуқраи соли 2018 дар Малайзия аст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
