Президентҳои Туркия ва Русия – Раҷаб Эрдуғон ва Владимир Путин 22 октябр дар шаҳри Сочӣ ба созиш расиданд, ки марзи муштараки Сурия ва Туркияро дар шарқ аз дарёи Фурот Анқара ва Москва бо ҳам назорат мекунанд.
Бино ба иттилои Бахши хабарии Осиёи Марказӣ, бар асоси созиш, ки матни онро вазири умури хориҷии Русия Сергей Лавров қироат кард, низомиёни турк минтақаи 30-километриеро назорат хоҳанд кард, ки дар натиҷаи амалиёти ахири худ ишғол намудаанд.
Ба минтақаи 30-километрии боқӣ сарбозони рус ворид шуда, гуруҳҳои мусаллаҳи курд бояд он ҷоро тарк кунанд. Сипас назорати муштараки марз аз сӯи низомиёни русу турк оғоз мешавад.
Эрдуғон 22 октябр аз шаҳри Сочии Русия боздид ва бо Путин дидору гуфтугӯ кард. Гуфтугӯи раҳбарони ду кишвар шаш соат идома ёфта, мавзуи меҳварии суҳбат амалиёти Туркия дар шимоли Сурия буд.
Ба гуфтаи Путин, ҷонибҳо дар ҷараёни гуфтугӯ тавонистанд, равиши муштараки ба эътидол овардани вазъ дар шимоли Сурияро интихоб кунанд. Путин ин созишро "хеле муҳим" ва "сарнавиштсоз "номид.
Мулоқоти Эрдуғон ва Путин дар ҳолест, ки имрӯз муҳлати оташбаси панҷрӯзаи тавофуқшуда миёни Анқара ва Вашингтон дар бораи Сурия ба поён мерасад. Панҷ рӯзи пеш Эрдуғон ва муовини раиси ҷумҳури Амрико дар мавриди оташбас дар шимол-шарқи Сурия ба созиш расида буданд.
Амалиёти Туркия дар хоки Сурия пас аз он оғоз шуд, ки Доналд Трамп, раиси ҷумҳури Амрико эълон кард, ки нерӯҳои кишварашро аз шимол-шарқи Сурия хориҷ мекунад. Ин нерӯҳо то ҳанӯз монеи ҳамлаҳои густурдаи Туркия ба ниманизомиёни курд шуда буданд.
Пас аз эъломи хуруҷи нерӯҳои амрикоӣ амалиёти низомии Туркия оғоз шуд. Ин амалиёт бо интиқодҳои мухталифе рӯбарӯ шудааст. Аммо Туркия онро "ҷанг бо терроризм" медонад. Анқара хостори таъсиси як "минтақаи амн" то 30-километрии дохили қаламрави Сурия аст, то нуфузи курдҳо дар марзҳои ҷанубии худро бигирад ва ҳамчунин муҳоҷирони суриягиро ба кишварашон бозгардонад.
