Рӯзи 26-уми феврал дар Варзишгоҳи марказии Душанбе байни дастаҳои “Хуҷанд”-и Хуҷанд ва “Нефтчӣ”-и Қирғизистон бозии ҷавобии даври плей-оффи Ҷоми Конфедератсияи футболи Осиё (КФО)-2020 баргузор шуд.
Бино ба иттилои Федератсияи футболи Тоҷикистон, вохӯрӣ бо ҳисоби калони 3 бар 0 ба фоидаи мизбонон анҷом ёфта, дастаи “Хуҷанд” ба даври гурӯҳии Ҷоми КФО-2020 роҳхат гирифт.
Гуфта мешавад ҳар се тӯбро ба дарвозаи ҳариф ҳамлагари дастаи Хуҷанд Дилшод Бозоров (дақиқаҳои 33, 107 ва 117-ум) ба ҳадаф расонид. Бозии аввалро дар Қирғизистон футболбозони тоҷик бо ҳисоби 0 бар 1 бохта буданд.
Дар марҳилаи гурӯҳии Ҷоми КФО-2020 “Хуҷанд” дар гурӯҳи “D”-и минтақаи Марказӣ ҳамроҳ бо тимҳои “Истиқлол” (Тоҷикистон), “Олтин Асир” (Туркманистон) ва “Дордой” (Қирғизистон) бозӣ мекунад.
Дар вохӯрии даври якум дар гурӯҳи “D” дастаҳои Тоҷикистон бо ҳамдигар бозӣ мекунанд. Бозӣ байни дастаҳои “Истиқлол” ва “Хуҷанд” рӯзи 11-уми март дар Варзишгоҳи марказии Душанбе доир мегардад. Оғози бозӣ соати 18:00.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
