Хабаргузориҳо аз густариши коронавирус дар саросари дунё иттилоъ медиҳанд. Бино ба иттилои маркази матбуоти КҲФ ва МГ ҶТ, чанде қабл аз сирояти як мард дар Бразилия хабар дода шуд, ки аз сафари Италия баргашта буд.
Тавре Folha de S.Paulo ва G1 менависанд, ин аввалин ҳолати тасдиқшудаи коронавирус дар кишварҳои Амрикои Лотинӣ мебошад. Ҳамин тариқ, ба ҷуз Антарктида, вируси нав дар тамоми қораҳои сайёра ба қайд гирифта шуд.
Дар маълумоти КҲФ қайд мешавад, ки кашфи беморони гирифтор ба короно дар иддае аз кишварҳо боис шудааст, ки коршиносон Италияро сарчашмаи паҳн шудани ин вирус ба Аврупо донанд. Ахиран Австрия, Хорватия, Швейсария дар Аврупо ва Алҷазоир дар Африқо гуфтанд, ки шаҳрвандони сироятшуда аз Италия баргашта буданд.
“Италия ахиран аз сирояти беш аз 300 нафар ва марги 11 нафар аз вируси короно хабар дод. Аммо бо вуҷуди он ки короно аз Италия ба Аврупо мегузарад, аксари кишварҳои аврупоӣ дар як нишасти изтирорӣ қавл додаанд, ки ҳоло ҳам марзҳои худ бо Италияро боз нигоҳ медоранд”, – қайд мешавад дар маълумот.
Британия донишҷӯёнеро, ки аз таътил дар Италия баргаштанд, ба хонаҳояшон ҷавоб додааст ва ҳамзамон дастурҳои наву мушаххаси эҳтиёт аз сирояти коронавирус нашр ва тақсим карда шудаанд.
Теъдоди мубталоёни короновирус дар Чин ба 80 ҳазор нафар расида, ҳудудан 2700 нафар аз ин беморӣ ҷон додаанд.
Дар Кореяи Ҷанубӣ қариб ҳазор нафар гирифтори вируси Covid-19 шудаанд ва 10 нафар фавтидаанд.
Марказҳои назорат ва пешгирии ИМА ҳушдор додаанд, ки вируси короно метавонад дар ин кишвар мушкилоти зиёд орад.
Дирӯз дар се нафар мусофирони русиягии киштии «Даймонд Принсесс», ки аз бандари Ҷопон ба шаҳри Қазон интиқол дода шуданд, сирояти коронавирус дар шакли сабук тасдиқ шудааст.
Бино ба маълумоти охир, шумори беморони коронавируси COVID-19 дар саросари дунё 82164 нафарро ташкил медиҳад. Аз оғози паҳншавии он беш аз 2800 нафар фавтида, 32860 кас муолиҷа ва солим шуданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
