Даромади буҷети давлатии Тоҷикистон дар нимсолаи аввал 9,8 млрд сомониро ташкил дод, ки аз нақшаи тасҳеҳшуда 4,5% ё худ 462,3 млн сомонӣ (ҳудуди 45 млн доллар) камтар аст.
Бино ба иттилои Вазорати молияи ҷумҳурӣ, камшавии даромад асосан аз ҳисоби иҷро нашудани нақшаи ҷамъоварии андозҳои асосӣ: андозҳо аз даромад, фоида ва аксизҳо ба вуҷуд омадааст.
Бо ин сабаб иҷрои қисмати хароҷоти буҷет муяссар нашуд: қариб ҳамаи соҳаҳо маблағҳои пешбинишударо гирифта натавонистанд.
Лекин маблағгузорӣ ба соҳаҳои ҳокимияти давлатӣ ва идоракунӣ, саноату сохтмон ва дигар фаъолияти иқтисодиву хизматрасонӣ аз ҳама бештар кам шуд.
Ёдрас мекунем, ки охири моҳи июни соли равон ба ҳукумати лозим омад, ки нишондиҳандаҳои буҷети имсоларо бозбинӣ намояд.
Ҳаҷми умумии нақшаи тасҳеҳшудаи даромади буҷет бо назардошти ҷалби маблағҳои грантӣ ба ҷойи 26,1 млрд сомонии қаблан тибқи нақша пешбинигардида 23,6 млрд сомонӣ муқаррар шуд.
Нақшаи тасҳеҳшудаи хароҷоти умумии буҷети давлатӣ дар ҳаҷми 26 млрд сомонӣ муқаррар шудааст, ки аз нақшаи аввалия 400 млн сомонӣ камтар аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
