Вазорати тандурустӣ ва ҳифзи иҷтимоии аҳолии Тоҷикистон дар доираи созишномаҳои қаблан баимзорасида бо Вазорати тандурустии Русия доир ба харидории ваксина бар зидди коронавируси COVID-19 гуфтушунид ба роҳ монд.
Бино ба иттилои маркази матбуоти Вазорат бо истинод ба муовини сардори Хадамоти назорати давлатии санитарию эпидемиологӣ Наврӯз Ҷаъфаров, гуфтушунидҳо тавассути роҳҳои дипломатӣ низ идома доранд.
Номбурда гуфтааст, ҳаҷми истеҳсоли ваксина дар Русия барои фурӯши оммавӣ ҳанӯз кофӣ нест, зеро ба нақша гирифта шудааст, ки дар як сол то 1,5 млн воя (доза) ваксина истеҳсол карда шавад, дар ҳоле ки худи аҳолии Россия 142 млн нафарро ташкил медиҳад. Тибқи арзёбиҳои пешакӣ, барои эм кардани аҳолии Русия тақрибан 9 сол лозим аст. Ба ҷуз Тоҷикистон, 26 давлати дигар низ барои харидории ваксина дар навбат қарор доранд.
“Азбаски байни Тоҷикистон ва Русия дар соҳаи тандурустӣ созишнома вуҷуд дорад, умед дорем, ки ба мо ин ваксина дастрас карда мешавад», – иброз доштааст ӯ.
Ба иттилои манбаъ, айни ҳол дар Вазорати тандурустӣ гурӯҳи корӣ оид ба ҳисобу китоб ва муайян намудани миқдори зарурии ваксина барои ҷумҳурӣ таъсис дода шуда, пеш аз ҳама, ваксина барои беморони гирифтори диабети қанд, бемориҳои роҳи нафас, кормандони соҳаи тиб, онҳое, ки ба ҳифзи сарҳад машғуланд ва танҳо баъд барои аҳолии солим ҳисоб карда мешавад.
«Ҳангоми ҳисобкунӣ инчунин бояд ба назар гирифт, ки миқдори муайяни одамони ба COVID-19 гирифторшуда, подтан (антитела) пайдо мекунанд ва ба ин одамон гузаронидани ваксина лозим намеояд, – қайд кардааст Наврӯзов. – Одатан, подтанҳо тақрибан ду сол фаъоланд”.
Зимнан зикр мешавад, ки ваксинаи Русия бар зидди коронавируси нав 11 август ба қайд гирифта шуда, ояндаи наздик истеҳсоли оммавии он шурӯъ мешавад ва аллакай моҳи октябр ваксинакунонии шаҳрвандони Русия, ки ба гурӯҳи осебпазир шомиланд, оғоз мегардад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
