Дар 2 ҳодисаи садамаи нақлиёт дар роҳҳои мошингарди Тоҷикистон 5 нафар ҳалок ва 2 каси дигар ҷароҳат бардоштанд.
Бино ба иттилои маркази матбуоти ВКД Тоҷикистон, дар роҳи автомобилгарди Душанбе – Хуҷанд дар қаламрави ноҳияи Айнӣ ронандаи автомашинаи тамғаи “Дулан” Абдулло Давлатови 35-сола ба хатти муқобили ҳаракати роҳ баромада, ба автомашинаи “Хундай” таҳти идораи Мунаввар Раҷабзодаи 54-сола бармехӯрад.
“Дар натиҷа ронандагони ҳар ду автомашина ва як мусофирзани 49-солаи автомашинаи “Хундай” дар ҷойи ҳодиса ба ҳалокат расида, боз 2 мусофири ҳарду автомашина ҷароҳат мегиранд ва дар бемористон бистарӣ шудаанд”, – қайд мешавад дар маълумот.
Дар ҳодисаи дигар, ки дар маркази ноҳияи Данғара рух додааст, Самариддин Сайдалиеви 25-сола аз уҳдаи идораи автомашинаи тамғаи “Опел-Вектра” набаромада, он ба панҷараи бетонӣ бархӯрдааст.
Гуфта мешавад, бар асари он сокинони маҳаллӣ Ҷонибек Ғуломов ва Рамазон Холов, ҳар ду 26-сола аз ҷароҳатҳои бардошта дар бемористон ҳалок шудаанд.
Мувофиқи таҳқиқоти Созмони ҷаҳонии тандурустӣ, сатҳи маргумир аз садамаҳои нақлиёт дар Тоҷикистон ҳамасола 19 кас ба ҳар 100 ҳазор нафар аҳолиро ташкил медиҳад, ки нишондиҳандаи баландтарин дар минтақаи Осиёи Марказӣ мебошад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
