Абдуллоҳ Абдуллоҳ, раиси Шӯрои олии Мусолиҳаи миллии Афғонистон бо як сафари расмӣ вориди Душанбе шуд. Як намояндаи Вазорати корҳои хориҷии Тоҷикистон аз фурудгоҳи Душанбе ба "Азия-Плюс" хабар дод, ки Абдуллоҳ Абдуллоҳ бо ҳамроҳонаш вориди Душанбе шуданд.
Абдуллоҳ Абдуллоҳ як соат қабл аз сафараш ба Душанбе дар саҳфаи фейсбукаш навишт, ки ин сафараш бо даъвати расмии Ҷумҳурии Тоҷикистон аст. "Ба силсилаи сафарҳои минтақаӣ барои ҷалби ҳимоят аз талошҳои сулҳ, ба даъвати расмии Ҷумҳурии Тоҷикистон дар раъси ҳайати олирутбаи Ҷумҳурии исломии Афғонистон озими Душанбе шудам".
Бино ба иттилои Вазорати корҳои хориҷӣ, қарор аст Абдуллоҳ Абдуллоҳ бо президенти Тоҷикистон Эмомалӣ Раҳмон, сарвазир Қоҳир Расулзода, раиси Маҷлиси намояндагони Маҷлиси Олии ҷумҳурӣ Маҳмадтоир Зокирзода ва вазири корҳои хориҷии Тоҷикистон Сироҷиддин Муҳриддин дидору гуфтугӯ кунад.
Ҳадафи сафари Абдуллоҳ Абдуллоҳ густариши равобити Афғонистону Тоҷикистон унвон мешавад, аммо тавре худи ӯ ҳам қабл аз сафар ишора кардааст, сафарҳои минтақаии раиси Шӯрои олии Мусолиҳаи миллии Афғонистон барои ҷалби ҳимояти кишварҳои ҳамсоя ва минтақа аз музокироти сулҳи Афғонистон анҷом мешаванд.
Тоҷикистон борҳо эълон кардааст, ки аз сулҳе, ки ба манфиатҳои миллии Ҷумҳурии исломии Афғонистон созгор аст, ҳимоят мекунад.
Бояд гуфт, ки пас аз ба имзо расидани созишномаи Иёлоти Муттаҳидаи Амрико ва гуруҳи "Толибон" бар сари сулҳ дар Афғонистон дар Давҳаи Қатар, дар ин кишвар музокирот миёни ҳайати расмии давлати Афғонистон ва гуруҳи "Толибон" ҷараён дорад.
Марҳилаи аввали семоҳаи музокироти ҳайати расмии давлати Афғонистон ва гуруҳи "Толибон" дар Давҳаи Қатар аввали ҳамин ҳафта ба охир расид, ки тими музокиракунандаи Афғонистон ба Кобул баргашт. Қарор аст баъд аз як муддати танаффус ин музокирот дубора ҷараён бигирад.
То кунун дар натиҷаи ин музокирот тавофуқе бар сари овардани сулҳ дар ин кишвар сурат нагирифтааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
