Қисмати даромади Буҷети давлатии Тоҷикистон давоми моҳҳои январ-августи соли ҷорӣ 5,1% ё худ ба маблағи 930 млн сомонӣ (82 млн доллар) барзиёд иҷро шуд, хабар медиҳад Вазорати молияи ҷумҳурӣ.
Ба ҷои 17 млрд 252 млн сомонии пешбинишуда ба "ҳамёни асосӣ"-и кишвар 18 млрд 182 сомонӣ (1,6 млрд доллар) ворид шуд.
Барзиёд иҷро шудани нақшаи буҷет, пеш аз ҳама афзоиши ҷамъоварии андозҳои асосӣ: андоз аз арзиши иловашуда, андоз аз даромад, андоз аз фоида ва аксизҳо маънидод мешавад. Аз ҳисоби воридот аз андоз имсол ҳудуди 72%-и қимати даромади буҷет таъмин шуд.
Ҳиссаи андозҳо дар ҳаҷми умумии даромадҳо тайи даҳ соли охир ба ҳисоби миёна 68%-ро ташкил медиҳад.
Қобили зикр аст, ки солҳои охир иҷрои нақшаи пешбинишудаи буҷети ҷумҳурӣ мунтазам таъмин намешуд ва маблағҳои камбуд аз даромад маъмулан охири сол аз ҳисоби кумакҳои шарикони байнулмилалии кишвар оид ба рушд рӯйпӯш карда мешуданд.
Қисмати даромади Буҷети давлатии Тоҷикистон барои соли 2021 дар ҳаҷми 27,6 млрд сомонӣ (2,4 млрд доллар) муқаррар шудааст, ки нисбат ба соли гузашта 1,6 млрд сомонӣ (141 млн доллар) зиёдтар аст.
Афзоиши ҳаҷми даромадро аз рӯйи натиҷаҳои соли ҷорӣ дар сатҳи 6,1% Кумитаи андоз ба дарёфти сарчашмаҳои нави андозбандӣ, афзоиши ҷамъоварии андозҳои асосӣ, инчунин таъмини рушди воқеии иқтисод таъсиси ҷойҳои нави корӣ рабт медиҳад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
