Сохтмони биноҳои нави парлумон ва ҳукумат дар шаҳри Душанбе тибқи ҷадвал идома дорад ва моҳи октябри соли 2023 ба анҷом мерасад. Дар ин бора раиси Кумитаи меъморӣ ва сохтмони ҷумҳурӣ Маҳмадсаид Зувайдзода, имрӯз, 4 феврал, дар нишасти хабарӣ иттилоъ дод.
Гуфта мешавад, ки сохтмони биноҳои парлумон ва ҳукумат дар заминаи ҳамкориҳои Тоҷикистону Чин бо кумаки молии Чин ба маблағи 1,5 миллиард юан (ҳудуди 220 миллион доллар) амалӣ хоҳад шуд.
Ба гуфтаи раис, бинои нави парлумон дар шафати хиёбони Рӯдакӣ бунёд шуда, дар қисми пеши он гулгашт бо фаввораҳо, роҳу пайроҳаҳо ба нақша гирифта шудааст. Баландии бинои асосӣ 49,7 метр, бо назардошти гунбаз – 70 метрро ташкил медиҳад. Масоҳати умумии бинои парлумон 42 ҳазору 874 метри мураббаъ мебошад.
Бинои ҳукумати Тоҷикистон дар қисми марказии шаҳри Душанбе, дар ҳудуди хиёбонҳои Рӯдакӣ ва Исмоили Сомонӣ ҷойгир мешавад. Масоҳати қитъаи замини маҷмааи ҳукумати Тоҷикистон 10,27 гектарро ташкил дода, дар он бинои 15 ошёнаи ҳукумат, ду бинои 13 ошёнаии идораҳои назди ҳукумат, гулгашт бо роҳу пайроҳаҳо бунёд мегардад.
Созишнома ҷудо кардани кумаки бебозгашт байни ҳукуматҳои ҳар ду кишвар моҳи сентябри соли 2017 зимни сафари давлатии раисҷумҳури Тоҷикистон Эмомалӣ Раҳмон ба Пекин имзо шуда буд.
Ҳамин тариқ, таҳкурсии биноҳоро моҳи октябри соли 2018 раисиҷумҳури Тоҷикистон Эмомалӣ Раҳмон ҳамроҳи сарвазири Шӯрои давлатии Чин Ли Кесян гузошта буд.
Гуфта мешуд, ки ҳарчанд сохтмон аз ҷониби Чин маблағгузорӣ шавад ҳам, мувофиқи созишнома, 80%-и коргарон аз Тоҷикистон ба кор қабул мешаванд.
Қаблан хабар дода шуда буд, ки Тоҷикистон воридоти таҷҳизот барои бунёди иншоотро аз пардохти молиёт ва боҷи гумрукӣ озод кардааст.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
