Ҳукумати Толибон кишт, истеҳсол ва масрафи тарёк ё хашхошро дар сар то сари Афғонистон манъ карданд. Фармони манъи кишти тарёк аз сӯйи Ҳайбатуллоҳ Охунзода, раҳбари ин гурӯҳ содир шудааст, ки ҳукумати Толионро онро рӯзи 3-юми апрел нашр карданд.
Дар фармони раҳбари Толибон омадааст, ки "аз ин ба баъд кишт, тавлид ва хариду фурӯши маводи мухаддир дар Афғонистон мамнуъ аст ва онҳое, ки аз ин фармон сарпечӣ мекунанд бо онҳо бар асоси шариати исломӣ бархурд хоҳад шуд.
Дар ин фармон ҳамчунин гуфта шудааст, ки "аз таърихи содир шудани ин фармон кишти кӯкнор (хашхош) дар тамоми кишвар ба таври комил мамнуъ аст ва ҳеч кас пас аз ин наметавонад барои кишти ин гиёҳ талош кунад".
Дар ҳоле Толибон масрафи маводи мухаддирро дар Афғонистон манъ кардаанд, ки бар асоси омори Вазорати тандурустии Афғонистон дар соли гузашта, пеш аз ба қудрат расидани Толибон шуъмори гирифторони нашъамандӣ (муътодон) дар ин кишвар ба 2,5 миллион нафар мерасад, ки наздик ба 750 ҳазор нафари онҳо занон мебошанд.
Дар фармони Толибон ҳамчунин омадааст, ки "истеъмоу интиқол, хариду фурӯш, тиҷорат, воридот ва содироту корхонаҳои тавлиди ҳар гуна маводи нашъовар, аз ҷумла шароб, ҳероин, шиша, таблет (таблетка, ҳабҳои равонгардон), чарс (ҳашиш) ва ғайра ба гунаи ҷиддӣ мамнуъ аст".
Абдусалом Ҳанафӣ, муовини раиси вазирони Толибон дар як маросими хосе, ки ин фармонро ҳамагонӣ мекарданд, аз ҷомеаи ҷаҳонӣ хостааст, ки дар кишти зироатҳои алтернатив ё ҷойгузини тарёк ба Афғонистон ёрӣ расонанд.
Дар Telegram, Facebook, Instagram, OK ва ВК бо мо бимонед.
Лутфан, хабари муҳим, суол ва аксу видеоҳои ҷолибро ба Asia-Plus тавассути Viber, Telegram, Whatsapp, Imo ба рақами +992 93 792 42 45 фиристед.
