Шаҳрдории Душанбе тахриби хонае, ки Мирзо Турсунзода, шоири маҳбубуи кишвар ва Қаҳрамони Тоҷикистон зистааст, рад кард ва гуфт, “бораи бартараф намудани он аз ҷониби мақомот ягон тасмим гирифта нашудааст”.
Ин ниҳод бо нашри як иттилоия хабар дод, ки “паҳн гардидани хабарҳо оиди бартараф намудани хонае, ки дар он Қаҳрамони Тоҷикистон, шоир Мирзо Турсунзода мезист, асоси воқеӣ надорад”.
Дирӯз, 11-уми сентябр, Радиои Озодӣ хабар дод, ки хонаеро, ки дар он Мирзо Турсунзода зистааст, вайрон мекунанд.
Ин манзили нахустини шоир дар Душанбе аст, ки дар паси чойхонаи “Роҳат” воқеъ буда, дар он ҷо шоир достони машҳури “Қиссаҳои Ҳиндустон”-ро офаридааст.
Қаблан, тахриби хонамузейи Садриддин Айнӣ, бунёдгузори адабиёти муосири тоҷик ва Қаҳрамони Тоҷикистон дар хиёбони Ҳамза Ҳакимзодаи шаҳри Душанбе баҳсеро ба миён оварда буд.
Аксари зиёиён мегуфтанд, тахриби он нодуруст аст ва бояд онро ҳамчун мероси таърихӣ ва фарҳангӣ нигоҳ дошт.
Ҳамин тариқ, Рустами Эмомалӣ, шаҳрдори Душанбе пас аз номаи донишмандон ва ҷомеаи шаҳрвандӣ дастур дод, ки ин бино тахриб нашавад.
