Директори Муассисаи давлатии “Пажӯҳишгоҳи илмӣ-тадқиқотии фарҳанг ва иттилоот”-и Вазорати фарҳанги Ҷумҳурии Тоҷикистон Шариф Комилзода бо гумони азхудкунии маблағҳои буҷетӣ аз сӯи кормандони Оҷонсии зидди фасод дастгир шудааст. Дар ин бора, маркази матбуотӣ Оҷонсии зиддифасод хабар медиҳад.
Манбаъ менависад, ки Шариф Комилзода бо сармуҳосиби “Пажӯҳишгоҳи илмӣ-тадқиқотии фарҳанг ва иттилоот” Маҳмад Бобоҷонов бо маслиҳати пешакӣ дар давраи фаъолияти кориашон солҳои 2019-2020 бо роҳи сохтакории ҳуҷҷатҳои муҳосиби 370760,82 сомониро бо роҳи азонихудкунӣ тасарруф намуда, ба эҳтиёҷоти шахсиашон сарф намуданд.
Оҷонсӣ мегӯяд, оиди ҳолати мазкур нисбати Камолзода ва ҳамроҳони ӯ бо моддаҳои 245 қисми 4 банди “б” ва 323 Кодекси ҷиноятии Тоҷикистон парвандаи ҷиноятӣ оғоз карда шуда, тафтиши пешакӣ идома дорад.
Шариф Комилзода 63 сол дошта, хатмкардаи Донишкадаи давлатии санъати Тоҷикистон мебошад.
Ӯ дар гузашта, сардори шӯъбаи равобити байналмилалии Кумитаи андоз, раиси Китобхонаи давлатии бачагона, сардори Раёсати фарҳанги Вазорати фарҳанги Ҷумҳурии Тоҷикистон, Директори Китобхонаи миллии Ҷумҳурии Тоҷикистон ба номи А. Фирдавсӣ буд.
Комилзода ҳамчунин, бо амри Президенти Ҷумҳурии Тоҷикистон Эмомалӣ Раҳмон як муддат ҳамчун муовини директори Муассисаи давлатии Китобхонаи миллии Тоҷикистон кор кардааст. Ӯ аз соли 2015 ба ҳайси директори Пажӯҳишгоҳи илмӣ тадқиқотии фарҳанг ва иттилооти Вазорати фарҳанги Ҷумҳурии Тоҷикистон кор мекард.
Гуфта мешавад, ки дар сурати тасдиқи айби мазкур Комилзода ва Бобоҷоновро аз 10 то 15 соли зиндон бо маҳрум кардан аз ҳуқуқи ишғоли мансабҳои муайян ва ё машғул шудан бо фаъолияти муайян то панҷ сол интизор аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
