ВКХ, КДАМ ва Агентии авиатсияи граждании Тоҷикистон тасмим гирифтаанд, ки дар фурудгоҳи Душанбе низоми наверо роҳандозӣ намоянд, ки ба мусофирон барои мустақилона аз қайд гузаштан имкон медиҳад.
Дар ин бора рӯзи 31 январ зимни нишасти матбуотӣ роҳбари Агентии авиатсияи граждании ҷумҳурӣ Дилшод Сафарзода хабар дод.
“Ин низоми нави Smart Gate мебошад, ки дар он мусофирон метавонанд дар шакли электронӣ худро ба қайд гузоранд, – гуфт Сафарзода. – Мусофир шиносномаашро тариқи дастгоҳи махсус гузаронида, ба ин тариқ худаш ба қайд гузошта мешавад”.
Мутаносибан, ба қавли Сафарзода, ба ҳузури ҷисмонии сарҳадбон ё корманди фурудгоҳ зарурат боқӣ намемонад.
Директори Агентӣ илова намуд, ки дастгоҳҳои Smart Gate аллакай дар фурудгоҳи Душанбе насб шуда, ба таври озмоишӣ кор мекунанд.
Сафарзода зикр кард, ки низоми мазкур барои ҳалли мушкили дер гоҳ истодани мусофирон зимни азназаргузаронӣ дар фурудгоҳи Душанбе роҳандозӣ мешавад.
Ба гуфтаи ӯ, чунин ҳолатҳо замоне ба миён меоянд, ки мусофирони якбора якчанд хатсайр дар назди нуқтаҳои азназаргузаронии сарҳадӣ дар фурудгоҳ ҷамъ мешаванд.
