Сафири Русия дар Тоҷикистон Семен Григорев дар вохӯрӣ бо муовини сарвазири Тоҷикистон Дилрабо Мансурӣ паёми раиси Шӯрои Федератсия Валентина Матвиенкоро ба ӯ расонид, ки дар он Мансурӣ барои иштирок дар Форуми авруосиёии занон дар Санкт-Петербург даъват мешавад. Дар ин бора ТАСС хабар медиҳад.
Ин вохӯрӣ рӯзи 27 май дар Душанбе баргузор шуд. Ҷонибҳо масоили рушди ҳамкорӣ байни Русия ва Тоҷикистонро дар соҳаҳои маорифу фарҳанг, инчунин татбиқи созишномаи байниҳукуматиро дар бораи сохтмони бинои нави Театри давлатии русии ба номи Владимир Маяковский дар Душанбе баррасӣ карданд.
Созишномаи мазкур 18 декабри соли 2023 дар ҷаласаи Комиссияи байниҳукуматии кишварҳо бо иштироки муовини сарвазири Русия Марат Ҳуснуллин ва сарвазири Тоҷикистон Қоҳир Расулзода ба имзо расида буд.
Моҳи апрели соли ҷорӣ ин санадҳо аз ҷониби парлумони Тоҷикистон тасдиқ карда шуданд.
Ёдрас мекунем, ки бинои кӯҳнаи Театри ба номи Маяковский дар шаҳри Душанбе соли 2016 тахриб шуд.
Форуми авруосиёии занон таҳти сарпарастии Шӯрои Федератсия дар се сол як маротиба баргузор мешавад. Имсол баргузории он рӯзҳои 18-20 сентябр дар Санкт-Петербург ба нақша гирифта шудааст. Дар доираи ин чорабинӣ ҷаласаи “бистгонаи занон” ва аввалин форуми занони кишварҳим узви БРИКС (давлатҳои узв – Русия, Чин, Бразилия, Ҳиндустон, Африқои Ҷанубӣ) доир мегардад.
Ёдрас мекунем, ки соли гузашта Дилрабо Мансурӣ ба ТОП-40 (40-гонаи беҳтарин)-и “Занони роҳбари Осиёи Марказӣ” шомил шуд.
