Дар Мастчоҳ зуҳри имрӯз аз як оила дастикам 5 нафар дар садамаи нақлиётӣ ҷон бохтанд. Гуфта мешавад, ки ин оила ба пешвози фарзанди муҳоҷирашон ба Хуҷанд рафта ва бо ӯ ба хона бармегаштанд.
Дар садамаи нақлиётие, ки зуҳри имрӯз дар даромадгоҳи ноҳияи Мастчоҳ рух дод, дастикам 7 сокини ин ноҳия ба ҳалокат расиданд, ки 2 нафарашон ноболиғ мебошанд.
Ба иттилои як масъул ҳукумати ноҳияи Мастчоҳ, 5 нафари онҳо узви як оила ҳастанд ва сокинони ҷамоати деҳоти Фотеҳободи ноҳия мебошанд.
Онҳо субҳи имрӯз барои пешвози фарзандашон ба Фурудгоҳи шаҳри Хуҷанд рафтаанд.
"Баъди пешвози муҳоҷир, падари хонадон ва дигар аҳли оила ба самти ноҳияи ҳаракат карданд. Дар роҳи даромадгоҳи ноҳия нақлиёти сабукрави кироякаш (таксӣ), ки самти ҳаракаташ Ойбек – Душанбе буд, бо мошини ҳомили 5 узви як оила бармехӯрад", – гуфт масъул.
Мақомот то ҳол расман дар ин бора маълумот надодаанд.
Сабаби рух додани ҳодиса ҳам дақиқ нест.
