Палатаи ҳисоб давоми шаш моҳи аввали соли 2024 дар сохтору идораҳои давлатӣ 67 санҷиши молиявӣ гузаронида, ба маблағи 183,9 миллион сомонӣ қоидавайронкунии молиявиро ошкор кардааст. Ин нисбат ба ҳамин давраи соли гузашта 87,1 миллион сомонӣ зиёд будааст.
Дар ин бора Қарахон Чиллазода, раиси Палатаи ҳисоб имрӯз, 7-уми август зимни нишасти матбуотӣ иттилоъ дода, таъкид кард, ки аз маблағи умумии зикргардида изофанависӣ 12 миллион сомонӣ, камомад ва тасарруфи воситаҳои молию пулӣ 1,6 миллион сомонӣ, хароҷоти ғайриқонунии пулию молӣ 26,5 миллион сомонӣ, фурӯш ва иҷораи амволи давлатӣ 1,6 миллион сомонӣ, талафи воситаҳои пулию молӣ 40,4 миллион сомонӣ ва маблағи кам ҳисобгардида ва рӯйпӯшнамудаи андозҳо 81,6 миллион сомониро ташкил медиҳад.
Аз ҷумла, Палатаи ҳисоб дар Бонки давлатии амонатгузории “Амонатбонк” 3 миллион сомонӣ хароҷоти ғайриқонунии пулию молӣ, 6 миллион сомонӣ маблағи кам ҳисобгардида ва рӯйпӯшнамудаи андозҳо ва 537,1 ҳазор сомонӣ изофанависиро ошкор кардааст.
Ин ниҳод ҳангоми баҳодиҳӣ ба ташаккул ва иҷрои қисми даромат ва хароҷоти буҷетҳои маҳаллӣ дар шаҳрҳои Конибодому Гулистони вилояти Суғд ба маблағи 5,8 миллион сомонӣ қоидавайронкуниҳои молиявиро ошкор кардааст.
Зимни баҳодиҳӣ ба ташаккул ва иҷрои қисми даромат ва хароҷоти буҷетҳои маҳаллии ноҳияи Восеъ ва вилояти Хатлон бошад, ба маблағи 6,3 миллион сомонӣ қоидавайронкунии молиявиро ошкор кардааст.
Ҳамчунин, дар ҷараёни чунин як чорабинӣ дар ноҳияи Тоҷикобод 1,2 миллион сомонӣ қоидавайронкунии молиявӣ ошкор шудааст.
Қарахон Чиллазода инчунин гуфт, барои таъмини истифодаи мақсаднок ва самараноки маблағи барои лоиҳаҳои сармоягузорӣ ҷудогардида низ санҷишҳои махсус гузаронида мешаванд. Аз ҷумла, дар Гурӯҳи татбиқи Лоиҳаи “Хизматрасонии маҷмӯӣ барои модар ва кӯдак”-и назди Вазорати тандурустӣ ва ҳифзи иҷтимоии аҳолӣ 429,8 ҳазор сомонӣ қоидавайронкунии молиявӣ ошкор шудааст.
Раиси Палатаи ҳисоб гуфт, қисми зиёди маблағҳои ошкоргардида барқарор шуда, 19 мавод ба маблағи 8,4 миллион сомонӣ ба Прокуратураи генералӣ, Агентии назорати давлатии молиявӣ ва мубориза бо коррупсия ва Кумитаи давлатии амнияти миллӣ барои ҷораҷӯӣ ва қабули қарорҳои дахлдор ирсол карда шуд.
Аммо ӯ дар хусуси теъдоди нафарони ба ҷавобгарӣ кашидашуда иттилоъ надод ва маълум нест, ки барои қоидавайронкунии молиявӣ чанд нафар ва чӣ гуна муҷозот шудаанд.
Қаблан Агентии назорати давлатии молиявӣ ва мубориза бо коррупсияи Ҷумҳурии Тоҷикистон низ ошкор шудани беш аз 200 миллион сомонӣ зарари молиявиро дар 9 моҳи соли 2023 эълон карда буд.
