Намояндагони шӯъбаи тафтишоти ҳарбии Кумитаи тафтишотии шаҳри Маскав дар ҳамдастӣ бо кормандони Вазорати корҳои дохилӣ дар Ҳавзаи маъмурии шарқии пойтахти Русия бо мақсади ошкор намудани далелҳои муҳоҷирати ғайриқонунӣ, инчунин санҷиши риояи қонунгузорӣ аз ҷониби муҳоҷироне, ки шаҳрвандии Русияро гирифтаанд, рейд гузарониданд. Дар ин бора «Коммерсант» хабар медиҳад.
Санҷиш дар автовокзали наздикии метрои «Щелковская», инчунин дар анбори нигаҳдории сабзавот ва хостелҳо (хобгоҳҳо) гузаронида шуд. Дар натиҷа ба даҳҳо нафар аз хориҷиёне, ки ба наздикӣ шаҳрвандии Русияро гирифтаанд, даъватномаҳо барои гузоштан ба қайди ҳарбӣ супорида шуд. Дар бораи он ки даъватномаҳо ба шаҳрвандони кадом кишварҳо дода шудаанд, маълумот дода нашудааст.
Чанд рӯз пештар кормандони ҳифзи ҳуқуқи Санкт-Петербург низ дар ҷойҳои кории муҳоҷирон як рейди васеъ гузарониданд.
Дар ин рейд беш аз 250 корманди полис ба бозорҳои калони яклухтфурӯшии шаҳр омада, аз миёни 2 ҳазор коргарони санҷидашуда зиёда аз 100 муҳоҷирро, ки ғайриқонунӣ дар Русия қарор доштанд, ошкор карданд. Ҳамаи онҳо ба шуъбаҳои пулис бурда шуда, нисбаташон парвандаҳои ҳуқуқвайронкунии маъмурӣ оғоз гардид. Ҳоло масъалаи ихроҷи онҳо баррасӣ мешавад.
Вазорати корҳои дохилии Русия дар ҳамдастӣ бо дигар сохторҳои марбута дар Маскав ва минтақаҳои Русия мунтазам чунин рейдҳо баргузор мекунад. Ин санҷишҳо дар моҳҳои охир, пас аз амали террористӣ дар «Крокус Сити Холл», ки дар он муҳоҷирон аз Тоҷикистон айбдор карда шуданд, хеле зиёдтар шуданд.
Рейдҳо дар ҷойҳои зист ва кории муҳоҷирон –анбору бозорҳо, корхона ва ҳатто дар масҷидҳо гузаронида мешаванд. Муҳоҷирони ғайриқонунӣ боздошт ва ихроҷ мешаванд. Ба онҳое, ки шаҳрвандии Русияро гирифтаанд, даъватномаҳо барои ба қайди ҳарбӣ гузоштан супурда мешавад. Бисёре аз онҳо аз комиссариати ҳарбӣ дарҳол ба хидмати ҳарбӣ фиристода мешаванд.
Раиси Кумитаи тафтишоти Русия Александр Бастрикин моҳи июн изҳор дошта буд, ки дар ҷараёни рейдҳо зиёда аз 30 ҳазор нафар, ки шаҳрвандии Русияро гирифта, лекин худро ба қайди ҳарбӣ нагузоштаанд, ошкор шудаанд. Ҳудуди 10 ҳазор нафари онҳо ба амалиёти ҳарбии махсус (СВО) ба Украина фиристода шуданд.
