Милитсияи шаҳри Душанбе волидайни се хонандаи мактабро барои кашидани “калян”-и электронӣ аз сӯи фарзандонашон дар мактаб то 1 ҳазору 400 сомонӣ ҷарима кардааст.
Раёсати ВКД дар пойтахт хабар медиҳад, ки хонандагон дар вақти танаффус дар ҳудуди мактаб “калян”-и электронӣ кашидаанд.
Онҳо хонандагони синфи 8-и мактаби №32-и ноҳияи Сино будаанд.
“Ҳолати мазкур аз ҷониби кормандони Шуъбачаи огоҳонӣ ва пешгирии ҳуқуқвайронкунӣ байни ноболиғон ва ҷавонони ШВКД-1 дар ноҳияи Сино, дар якҷоягӣ бо роҳбарияти муассисаи мазкур ошкор ва пешгирӣ карда шуд”,-омадааст дар хабар.
Барои ин кирдор мақомот волидайн онҳоро ба милитсия даъват карда, барои иҷро накардани уҳдадорӣ оид ба таълиму тарбияи кӯдак (моддаи 90-и Кодекси ҳуқуқвайронкунии маъмурии Тоҷикистон) ҷарима кардаанд.
РВКД дар пойтахт нагуфтааст,, ки онҳо чӣ қадар ҷарима шуданд. Вале банди 2-юми ин модда, ки ба муассисаи таълимӣ овардани маҳсулоти тамоку… мадҳушкунандаи дигар аз 1 ҳазору 80 то 1 ҳазору 440 сомонӣ (аз 15 то 20 нишондиҳанда барои ҳисобҳо, -1 нишониҳанда 72 сомонӣ) ҷарима пешбинӣ мекунад.
Ёдовар мешавем, ки тибқи тағйироте, ки ахиран ба Кодекси ҳуқуқвайронкунии маъмурӣ ворид шуд, дар Тоҷикистон волидайн барои ба мактаб бурдани сигору нос, воситаҳои нашъадор ё спиртӣ қариб 1 ҳазору 500 сомонӣ ҷарима мешаванд.
Агар ин кирдор такроран содир шавад, аз 2 ҳазору 160 то 2 ҳазору 520 сомонӣ ҷарима татбиқ карда мешавад.
