Имрӯз, 10-уми ноябр, дар Тоҷикистон Рӯзи милитсия таҷлил мегардад. Дар робита ба ин, аз сокинони Душанбе пурсидем, ки то куҷо худро амн ҳис мекунанд.
Аксари пурсидашудагон гуфтанд, ки дар маркази шаҳр ва маҳалҳои атрофи он худро бехатар эҳсос мекунанд, вале дуртар аз марказ барояшон хавфнок менамояд. Махсусан, шабона.
Аз амният бештар духтарон шикоят карданд. Ба қавли онҳо, дар дилхоҳ ҷою вақт нафаре метавонад ба духтарон чизе гӯяд, роҳашонро гирад ва ё дашном диҳад.
“Онҳоро, аксаран, ҳатто оиладориву ҳамроҳам будани фарзандам боз намедорад”, – гуфт яке аз сокинон.
Дар умум, аксарият қайд намуданд, ки вазъи бехатарӣ нисбат ба солҳои қаблӣ беҳтар аст ва имрӯз метавон то нимашаб озод дар кӯчаҳои пойтахт сайругашт кард.
