Бонки миллии Тоҷикистон як изҳороте нашр кард, ки дар он аз шаҳрвандони Тоҷикистон хоҳиш мешавад ба эълонҳои бардурӯғ дар шабакаҳои иҷтимоӣ аз номи Бонк бовар накунанд.
Дар изҳорот гуфта мешавад, ки ин эълонҳо ба Бонки миллӣ ҳеҷ муносибате надоранд.
“Бинобар ин ба онҳо бовар накунед ва ба шахсони бегона маълумотҳои шахсии худро, аз ҷумла: ному насаб, рақами корти бонкӣ ва рамзҳои махфие, ки тавассути СМС паём ворид мегарданд, пешниҳод насозед!”, – таъкид мешавад дар изҳорот.
Ахиран дар Тоҷикистон ҳодисаҳои қаллобӣ тариқи шабакаи Интернет зиёд ба назар мерасанд.
Қаблан қаллобон барои фиреби шаҳрвандон аз номи ширкат ва шахсиятҳои маъруф, аз ҷумла ширкатҳои «Toyota», «Beko», бонкҳои «Эсхата», «Амонатбонк», «Душанбе Сити Банк», инчунин номи президент ва шаҳрдори Душанбе истифода мебурданд.
Нимаи дуюми моҳи ноябр Бонки миллии Тоҷикистон пас аз нашр ва паҳн шудани навори пулҳои қалбакӣ дар шабакаҳои иҷтимоӣ, аз шаҳрвандон хост, ки дар вақти додугирифт эҳтиёткор бошанд.
Чанде пеш Раёсати ВКД дар шаҳри Душанбе шаҳрвандонро аз зиёдшавии ҳолатҳои қаллобӣ дар платформаҳои интернетии эълонҳо ҳушдор дод.
Зикр шуд, ки шахсони қаллоб эълонҳоеро нашр мекунанд, ки ҳангоми тамос гирифтан аз шаҳрвандон пешпардохт талаб менамоянд. Пас аз гирифтани маблағ, онҳо алоқаи худро қатъ намуда, рақамҳои телефонашон низ ғайрифаъол мешаванд.
Ба сурати умум, ба иттилои Раёсат, дар рӯзҳои охир ҳолатҳои қаллобӣ дар шабакаҳои интернетӣ зиёд шудаанд.
Раёсат барои пешгирӣ аз чунин ҳолатҳо чунин тавсияҳо дода буд:
– Ҳеҷ гоҳ ба шахсони ношинос пешпардохт ирсол накунед. Маблағро танҳо пас аз гирифтани мол ё хизматрасонӣ супоред;
– Маълумоти фурӯшандаро тафтиш намоед. Агар шубҳа дошта бошед, маълумоти иловагӣ ё акси дигарро талаб кунед;
– Ба эълонҳое, ки нархи паст доранд, бо эҳтиёт муносибат намоед. Ин метавонад найранги фиребгарон бошад.
Ҳамчунин дархост шуда буд, ки дар бораи амалиётҳои шубҳанок хабар дода, дар сурати рӯ ба рӯ шудан бо чунин ҳолатҳо, фавран ба мақомоти корҳои дохилӣ муроҷиат кардан лозим аст.
“Дар хотир доред, ки амнияти шумо дар дасти худи шумост! Агар шумо қурбони ҳамин гуна қалобон гардидед, фавран ба шӯъбаи наздиктарини милитсия муроҷиат намоед ва ё бо рақами 102 дар тамос шавед!”, – таъкид шуда буд дар огоҳии Раёсати ВКД дар пойтахт.
Қобили зикр аст, ки сарфи назар аз чандин маротиба огоҳ намудан, ҳолатҳои қаллобӣ ва фиреб дар шабакаи интернет ҳамоно ба қайд гирифта мешаванд ва шахсони ҷудогонаву ширкатҳо то ҳол дар бораи чунин ҳолатҳо хабар медиҳанд.
