Шаҳрвандони Эрон акнун метавонанд то 30 рӯз бидуни бақайдгирии ҳатмӣ дар Тоҷикистон ҳузур дошта бошанд. Ин ба туфайли қабули қарори ҳукумати Тоҷикистон аз 29-уми майи соли 2025 имконпазир шуд, ки мувофиқи он ба қоидаҳои вуруд ва ҳузури шаҳрвандони хориҷӣ тағйирот ворид гардид.
Тавре ки Вазорати корҳои хориҷии ҷумҳурӣ хабар медиҳад, ин тағйирот дар доираи бозбинии қарори ҳукумати ҶТ “Дар бораи Қоидаҳои ворид шудан ба ҶТ, будубош, баромадани шаҳрвандони хориҷӣ ва шахсони бешаҳрванд аз ҶТ ва гузаштани транзитии онҳо тавассути ҳудуди ҶТ” сурат гирифт.
Мутобиқи он шаҳрвандони Эрон аз бақайдгирии ҳатмии шиносномаҳои худ дар мақомоти корҳои дохилии Тоыикистон ба муҳлати 30 рӯз аз санаи ворид шудан ба ҳудуди кишвар озод карда мешаванд.
“Ин тағйирот, ки бар асоси баробарӣ ворид шуд, нияти Тоҷикистонро баҳри беҳбуди шароит барои шаҳрвандони кишварҳои ҳамсоя таҷассум месозад. Ин дар навбати худ, ба таҳкими робитаҳои байнулмилалӣ ва соддаву осон кардани ҳамкориҳои мутақобила мусоидат менамояд”, – зикр мешавад дар хабар.
Ёдрас мекунем, ки моҳи январи соли равон президенти Эрон Масъуд Пизишкиён бо сафари давлатӣ ба Тоҷикистон омад.
Натиҷаҳои сафари давлатии президенти Эрон ба Тоҷикистонро Эмомалӣ Раҳмон “оғози марҳилаи нав дар рушд ва тавсеъаи муносибатҳои бисёрҷониба бо ин кишвари дӯсту бародар” арзёбӣ намуд.
Зимни вохӯрӣ ва гуфтушунидҳо дар стаҳи олӣ байни Тоҷикистон ва Эрон 23 санади ҳамкории дуҷониба, аз ҷумла як қатор созишномаҳо ба маблағи зиёда аз 450 млн доллар ба имзо расиданд.
Ҳамчунин Тоҷикистон ва Эрон реҷаи раводидро осон карданд:. Шаҳрвандони давлатҳо ҳуқуқ пайдо намуданд, ки дар давраи 90 рӯз бидуни дарёфти раводид то 30 рӯз дар қаламрави ҳамдигар ҳузур дошта бошанд.
Қобили зикр аст, ки айни замон 160 ширкат бо сармояи Эрон дар Тоҷикистон фаъолият дошта, ҳаҷми ҳамлу нақли молу маҳсулот байни кишварҳо дар муқоиса бо солҳои пешин 3,2 баробар афзудааст.
