Дар 6 моҳи соли 2025 ба Тоҷикистон 761,4 ҳазор сайёҳи хориҷӣ омадааст, ки ин нисбат ба ҳамин давраи соли гузашта 180,9 ҳазор нафар ё 31% зиёд мебошад.
Кумитаи рушди сайёҳии кишвар мегӯяд, аз шумораи умумии сайёҳон, 59,8 ҳазор нафарро сайёҳон аз хориҷи дур ва 699,2 ҳазор нафарро аз кишварҳои Иттиҳоди давлатҳои мустақил (ИДМ) ташкил медиҳад.
Шумораи вуруди сайёҳон назар ба 6 моҳи соли гузашта аз кишварҳои хориҷи дур 1,1% кам, вале аз аз кишварҳои ИДМ 31% афзудааст.
Аз ин ниҳод нагуфтанд, ки мушаххас аз кадом кишварҳо бештар сайёҳон ба Тоҷикистон ворид шуданд. Ваъда карданд, ки ин омор рузҳои наздик дастрас мешавад.
Дар ҳамин ҳол, қаблан Агентии омор хабар дода буд, ки аз 307 ҳазор сайёҳе, ки дар 3 моҳи аввали соли 2025 ба Тоҷикистон омаданд, 64,1% онҳо аз Ӯзбекистон будаанд. Дар ҷои дуюм сайёҳон аз Русия 23,6 фоизи теъдоди умумии сайёҳонро ташкил додаанд.
Аз мамлакатҳои хориҷи дур, дар ҷои аввал Чин бо 7,1 ҳазор нафар, Эрон бо 3,9 ҳазор нафар дар ҷои дуввум ва Афғонистон бо 3,2 ҳазор нафар дар ҷои сеюм буданд.
Мақомоти Тоҷикистон пайваста аз афзоиши шумори сайёҳон ва беҳбудӣ дар хидматрасонӣ ба онҳо, ситоиш мекунад. Вале камбуди ҳоҷатхонаҳо дар роҳу минтақаҳои сайёҳӣ, суръати пасти интернет ва чангу ғубор аз таъсири сохтмону таъмири роҳҳо, аз мушкилиҳое ҳастанд, ки боиси нороҳатии бархе ҷаҳонгардон шудааст.
