Носир Саид, раиси Кумитаи телевизион ва радиои Тоҷикистон мегӯяд, дар телевизионҳои Тоҷикистон ҳеҷ маҳдудият барои пахши сурудҳои сарояндаҳо, хабари марг ё “некролог”-ҳо дар бораи даргузашти шахсиятҳои илмиву фарҳангӣ ва иштироки мардон бо риш дар барномаҳо вуҷуд надорад. Ӯ дар ин бора рӯзи 21-уми июл дар посух ба саволи хабарнигори “Азия-Плюс” дар нишасти матбуотии ниҳоди зери роҳбариаш ҳарф зад.
“Қаблан ҳам дар ин мавзӯъ мушкиле набуд. Ба эфир одамони босавод ва мутахассисони касбӣ даъват мешаванд, то дуруст гап зананд ва тасвиру услуби барномаҳо ҳам хуб бошад”, – гуфт Носир Саид.
Ӯ дар мавриди он ки баъзе сарояндаҳо аз пахш нашудани сурудҳояшон дар телевизионҳои давлатӣ шикоят мекунанд, изҳор дошт, ки “агар мавридҳои мушаххасе вуҷуд дошта бошад, ҳунармандон метавонанд мустақиман ба Кумита муроҷиат кунанд”.
Ин гуфтаҳои раиси Кумита дар ҳолест, ки дар гузашта вуҷуди “рӯйхати сиёҳ” барои пахши суруди овозхонони тоҷик, пахш нашудани хабари марги шахсиятҳои маъруф ва иштироки мардони ришдор дар барномаҳо баҳсбарангез шуда буд. Дар мавриди мавҷуд будани “рӯйхати сиёҳ” барои пахши суруди овозхонони тоҷик чанд сол инҷониб баҳсҳо вуҷуд доранд. Сарояндагон низ аз мавҷуд будани “рӯйхати сиёҳ” нигаронӣ доранд, вале масъулин мегӯяд, “рӯйхати сиёҳ” вуҷуд надорад, пул диҳанд – минбар медиҳем”.
Роҳбари Кумитаи телевизион ва радио дар нишасти қаблии ин ниҳод норасоии мутахассисони техникӣ аз ҷумла, наворбардор, садобардор, садогузор ва кам будани идеяҳои ҷолиб, ки ба талаботи имрӯза ҷавобгӯ бошад, мушкили аслии соҳаи зери рорҳбариаш унвон карда буд. Ба гуфтаи ӯ, идеяҳои эҷодкорона, ки набзи бо зиндагӣ ҳамсон будани барномаҳоро таъмин кунанд, хеле каманд. Вале дигар номуайян боқӣ монд, ки ин мушкилиҳо ҳалли худро ёфтаанд, ё не.
Ёдовар мешавем, ки дар замони фаъолияти Нуриддин Саид, раиси пешини Кумитаи телевизион ва радио, ки бо иқдому баёнияҳои аҷибаш дар матбуот ва расонаҳо шӯҳрат дошт, дар телевизионҳои давлатӣ як қатор маҳдудият ҷорӣ шуда буд.
Аз ҷумла, ӯ иштироки мардони ришдорро дар рекламаи телевизионҳо “экспансия” ё интиқоли маҷбурии фарҳангу мафкура номида, чунин зуҳуротро хилофи Истиқлоли давлатии Тоҷикистон гуфта буд.
Ҳамчунин дар замони роҳбарии ӯ саҳнаҳои ҳаҷвӣ аз телевизионҳо гум шуда буданд ва Нуриддин Саид дар нишасти матбуотӣ гуфта буд, ки “Лаҳзаҳои гуворо” (гурӯҳи ҳаҷвӣ) аз онҳо пул талаб кардааст, вале Кумита тавони пардохти онро надорад. Ин дар ҳоле буд, ки ҳаҷвнигорон аз даъват нашуданашон ба телевизионҳо шиква доштанд.
"Барои таъсиси телевизион ва радиои нав дархост ворид нашудааст"
Носир Саид дар нишасти матбуотӣ гуфт, дар 6 моҳи соли ҷорӣ ба ин ниҳод ягон дархост барои таъсиси телевизион ва радиои нав ворид нашудааст.
Ӯ гуфт, сабаби набудани дархостҳо барояш номаълум аст ва илова кард, ки агар дар оянда барои таъсиси шабакаҳои телевизионӣ ё радиоҳо ба Кумита дархост шавад, барои ин кор монеае вуҷуд нахоҳад дошт.
Ҳоло, тибқи иттилои Носир Саид, дар Тоҷикистон 104 телевизион ва радиои фаъолият мекунанд:
– 15 телевизионии давлатӣ ва 17 телевизионии хусусӣ,
– 10 радиои давлатӣ ва 24 радиои хусусӣ,
– 17 телевизиони ноқилӣ ва 5 телевизони IP,
– 16 студияи истеҳсоли маҳсулоти аудиовизуалӣ.
Дар ин миён телевизионҳои давлатӣ, ки аз ҳисоби андози мардум фаъолият мекунанд, аз имкониятҳои васеътаре бархӯрдоранд ва дар тамоми минтақаҳо дастрасанд.
