Хонандагони синфҳои болоӣ (аз 5 то 11) ва донишҷӯён ба муносибати ҷашни истиқлол рӯзҳои 7-ум ва 9-уми сентябр истироҳат мекунанд. Вале рӯзи душанбеи 8-уми сентябр барои онҳо рӯзи дарсӣ аст.
Хонандагони синфҳои ибтидоӣ (аз 1 то 4) ва таълимгирандагони кӯдакистонҳо бошад, се рӯз пайдарпай – 7, 8, ва 9-уми сентябр истироҳат мекунанд. Дарсҳои рӯзи 8-уми сентябри онҳо ба 6-уми сентябр интиқол шуд.
Дар ин бора аз Вазорати маориф ва илми Тоҷикистон ба "Азия-Плюс" хабар дода, гуфтанд, барои кормандони соҳаи маориф ва илм, ки дар як ҳафта 5 рӯз кор мекунанд, рӯзҳои 7, 8 ва 9-уми сентябр таътил эълон шудааст. Нафароне, ки 6 рӯзи корӣ дар ҳафта барояшон муайян шудааст, рӯзи душанбе, 8-уми сентябр, бояд ба кор бароянд.
Имсол ба муносибати ҷашни Истиқлоли давлатӣ, сокинони кишвар, ки реҷаи 5-рӯзаи корӣ дар ҳафта доранд, се рӯз пайиҳам – 7, 8 ва 9-уми сентябр истироҳат мекунанд.
Ҳамасола дар Тоҷикистон рӯзи 9-уми сентябр ҳамчун Рӯзи Истиқлоли давлатии Тоҷикистон таҷлил мешавад. Имсол аз ба даст овардани истиқлоли давлатӣ дар Тоҷикитсон 34 сол пур мешавад.
Бояд гуфт, ки имсол чорабинии асосӣ ба ифтихори ҷашни 34-солагии Истиқлоли давлатии Тоҷикистон дар шаҳри Кӯлоб бо иштироки Эмомалӣ Раҳмон, раисҷумҳури кишвар баргузор мешавад. Ҳамчунин, дар вилоятҳо ва ноҳияҳои шаҳри Душанбе чорабиниҳои фарҳангӣ ва фароғатӣ ба нақша гирифта шудааст.
