Рӯзи 1-уми сентябр охирин муҳлат барои нақлиёти ҷамъиятӣ барои гузариш ба истифодаи нақлиёти барқӣ (электромобил) буд. Дар ин бора қарори шаҳрдори пойтахт аз 4-уми июни соли 2024, таҳти №362 содир шуда буд. То куҷо ин қарор иҷро гардид? Бо ин суол ба шаҳрдории Душанбе муроҷиат кардем.
Дар посухи расмии Раҳмиддин Саломзода, муовини раиси шаҳри Душанбе зикр мешавад, ки ҳадаф пурра иҷро нагардид, аммо пешрафт мушоҳида мешавад ва иҷрои қарор идома дорад.
Аллакай чӣ корҳо иҷро шуданд?
Мувофиқи маълумоти шаҳрдории Душанбе:
– Аз 12 000 нақлиёти барқии кирокаши дар нақша пешбинигардида, 11 640 нақлиёти барқӣ аллакай фаъолият мекунанд. Дар ҳамин ҳол, таъкид мешавад, ки ширкатҳи кирокаши ба низоми барқӣ нагузашта, аз ҳақи кор маҳрум шуданд.
– Дар истгоҳҳои ширкатҳои кирокаши хадамотрасон 112 адад нуқтаи нерӯдиҳӣ насб карда шуданд.
– Дар доираи лоиҳаи “Шаҳри сабз” насби 738 адад нуқтаҳои нерӯдиҳӣ дар кӯчаҳо оғоз шуд. Аз ин миқдор 286 нуқта аллакай мавриди истифода қарор гирифтааст, ки дар як вақт метавонанд ба то 572 электромоил нерӯ диҳанд.
– Аз соли 2023 дар Душанбе дар корхонаи муштараки Akiya Avesto Automotive Industry истеҳсоли автобусҳои барқӣ ба роҳ монда шудааст. То имрӯз 60 электробус ба тавозуни корхонаи коммуналии “Автобус-1” дода шуда, дар хатсайри автобусҳои №3, №8 ва №18 равуо мекунанд.
– Дар бораи таҳвили боз 30 автобуси нави барқӣ қарордод ба имзо расонида шудааст.
– Иншооти зерсохтори нерӯдиҳӣ барои онҳо аллакай мавриди истифода қарор дода шудааст.
Минбаъд чӣ корҳо дар назар аст?
Ба иттилои шаҳрдории пойтахт, амалисозии лоиҳа дар доираи Барномаи рушди нақлиёти барқӣ дар Тоҷикистон барои солҳои 2023-2028, ки аз ҷониби ҳукумат тасдиқ шудааст, идома дорад.
Самтҳои афзалиятноки барнома:
– васеъ кардани шабакаи нуқтаҳои нерӯдиҳӣ;
– афзоиши ҳиссаи истеҳсолоти ватанӣ;
– харидории минбаъдаи автобусҳои барқӣ;
-рушди лоиҳаҳои “Шаҳри ҳушманд” ва “Шаҳри сабз”.
Гузариш ба нақлиёти барқӣ раванди бузургмиқёс ва марҳила ба марҳила аст, бахусус дар шароити буҷети маҳдуд ва мушкилиҳо дар зерсохтор.
Парки кирокашҳои шаҳр қариб пурра нав шуда, истеҳсоли электробусҳо дар дохил роҳандозӣ ва насби шабакаи нуқтаҳои нерӯдиҳӣ ҷараён дорад. Лекин дар мавриди душвориҳо, тасҳеҳи муҳлатҳои иҷрои нақша ва иқдомҳои минбаъда саволҳо ба миён меоянд. Дар ин хусус шаҳрдорӣ ҳоло посухҳои мушаххас намедиҳад.
