Расонаҳои покистонӣ ва афғонистонӣ аз кушта шудани як фармондеҳи ДОИШ-и Хуросон* дар Афғонистон хабар додаанд. Онҳо аз ӯ Муҳаммад Эҳсонӣ ном бурданд ва гуфтанд, "шаҳрванди Тоҷикистон аст".
Ба иттилои манобеи расонаҳо, Муҳаммад Эҳсонӣ, ки бо номи “Анвар” маъруф буд, ахиран дар шаҳри Мазори Шариф аз сӯйи афроди номаълум ба қатл расонида шудааст.
Толибон*, ки ҳукумати Афғонистонро дар даст доранд, то ҳол ин хабарро рад ё тасдиқ накардаанд. Ҷузъиёти бештаре дар бораи кушта шудани фармондеҳи ДОИШ нашр нашудааст. Маълум нест, ки ӯ кай, аз ҷониби кӣ ва дақиқан дар кадом нуқтаи шаҳр кушта шудааст.
Хабаргузориии форсии “Parstoday” менависад, ки ин фард дар сафи ДОИШ-и Хуросон “масъули ҷалби интиҳориён” ва “сохту ҷобаҷогузории бомбҳо” будааст.
Тибқи гузориши расонаҳои Покистон, Эҳсонӣ шаҳрванди Тоҷикистон буда, дар амалиёте дар масҷиди Пешовари Покистон “нақши калидӣ” доштааст. Дар ин амалиёти террористӣ 67 намозгузор кушта шуданд.
Мақомоти Тоҷикистон то кунун ба ин хабар вокуниш накардаанд.
То ҳол бо номи Муҳаммади Эҳсонӣ дар расонаҳои кишвар ҳам иттилое нашр нашудааст ва дақиқ нест, ки номбурда ҳақиқатан шаҳрванди Тоҷикистон ҳаст ва ё на.
Ба иттилои манобеи расонаҳо, Муҳаммад Эҳсонӣ дар амалиёте аз ҷониби нерӯҳои Покистон кушта шудааст ва ин дувумин амалиёти Покистон дар ҳудуди Афғонистон аст.
Хабаргузории “Shahraranews” менависад, ки нерӯҳои амниятии Покистон дар моҳи сентябри соли 2025 дар як амалиёт дар Афғонистон 3 узви бахши ДОИШ-и Хуросон, аз ҷумла як шаҳрванди Афғонистонро кушта буданд.
Дар асоси гузоришҳои Созмони Милали Муттаҳид, ҳудуди 2 ҳазор ҷангҷӯи ДОИШ дар Афғонистон ҳузур доранд. Аммо Толибон борҳо ҳузури гурӯҳҳои террористӣ ва ҷангиёни хориҷӣ дар Афғонистонро рад карда ва гузоришҳои СММ дар ин бораро "таблиғотӣ" донистааст.
Ёдовар мешавем, ки Рамазон Раҳимзода, вазири корҳои дохилии Тоҷикистон дар нишасти матбуотии моҳи феврали имсол гуфт, ки дар муҳорибаҳои ҷангӣ дар Сурия, Ироқ ва Афғонистон беш аз 2 ҳазор 500 шаҳрванди Тоҷикистон ширкат варзида, аз ин теъдод, 1 ҳазор 455 тан кушта шудаанд.
То кунун даҳҳо шаҳрванди кишвар бо иттиҳоми пайвастан ба сафи гурӯҳҳои террористӣ, ба мисли ДОИШ-и Хуросон боздошт ва равонаи зиндон шудаанд.
ДОИШ-и Хуросон чӣ гуна гурӯҳ аст ва оё Тоҷикистон ва кишварҳои Осиёи Марказӣ бояд ҳарос дошта бошанд? Дар ин матлаби таҳлилӣ мутолиа кунед.
*Дар Тоҷикистон гурӯҳи террористӣ эътироф шудаанд.
Ҳар он чи дар Афғонистон рух медиҳад, метавонед мустақиман дар сужаи мо – "Афғонистон" бихонед.
