Зиёд кардани реҷаи таъмини барқ ба аҳолӣ дар моҳи Рамазон аз сатҳи оби обанбори “Норак” ва резиши об ба дарёи Вахш вобаста аст. Ин нуктаро Маҳмадумар Асозода, раиси ширкати “Барқи тоҷик” имрӯз, 3-юми феврал дар нишасти матбуотӣ зикр кард.
Бо вуҷуди ин, номбурда дар посух ба суоли хабарнигори “Азия-Плюс” гуфт, “дастрасии аҳолӣ бо нерӯи барқ дар моҳи Рамазон, ки 18-уми феврал оғоз мешавад, беҳтар хоҳад шуд”.
Вале нагуфт, ки маҳдудияти барқ барои аҳолӣ то чӣ андоза сабук мешавад ва ба онҳо то чанд соат барқи бештар дода мешавад.
“Аммо соати муайяне, ки чӣ қадар зиёд карда мешавад, ин вобаста ба сатҳи обанбори “Норак” дар рӯзи 18-уми феврал ва инчунин резиши об ба маҷрои дарёи Вахш муайян карда мешавад. Бо пешниҳоди ҳукумати кишвар ин соатҳо ҳатман иҷро карда мешаванд”,-гуфт, раиси “Барқи тоҷик”.
Ба гуфтаи Асозода, то 3-юми феврал сатҳи оби обанбори нерӯгоҳи “Норак” каме бештар аз 885 метр аст, ки нисбат ба ҳамин давраи соли гузашта 65 сантиметр баландтар мебошад. Ӯ афзуд, ки ҷараёни об ба дарёи Вахш низ айни замон тадриҷан аз миёна зиёдтар аст.
ИЗОБРАЖЕНИЕ Маҳмадумар Асозода
Ба иттилои мақомот, нуқтаи баланди пуршавии обанбор 910 метр ва нуқтаи пасттарини он 857 метрро ташкил медиҳад. Аз ин рӯ, оби истифодашуда дар обанбор ба ҳолати 3-юми феврал, 28 метр мебошад.
Қаблан, Далер Ҷумъа, вазири энерҷӣ ва зихираҳои оби кишвар низ ваъда дода буд, ки дар моҳи Рамазон реҷаи интиқоли барқ пурра риоя мешавад ва имкон дорад, ки аҳолӣ бештар бо барқ таъмин шаванд. Ӯ ҳам нагуфт, ки интиқоли барқ дар ин марҳила чӣ қадар зиёд хоҳад шуд ва ин аз резиши об дар дарёҳо вобаста аст.
Ба гуфтаи вазир, айни замон аҳолӣ 7 соат, субҳ аз соати 5:00 то 8:00 ва шом аз соати 17:00 то 21:00 бо барқ таъмин ҳастанд.
Дар Тоҷикистон ҳамасола аз охири тирамоҳ то нимаи баҳор маҳдудияти нерӯи барқ ҷорӣ мешавад. Ду соли охир он дар нимаи дуввуми моҳи сентябр оғоз мешавад.
Имсол сокинони минтақаи Тоҷикистон аз “лимит” шадиди барқ нигаронӣ карда гуфтанд, ки баъзе вақтҳо дар як шабонарӯз аз 2 то 4 соат бо барқ таъмин буданд. Ба таъкиди онҳо, ин реҷа ҳам на ҳама вақт риоя мешуд. Масъулини интиқолу тақсимоти барқ тасдиқ карданд, ки дар кишвар, “дар интиқоли барқ маҳдудияти сахт ҷорӣ шудааст” ва мушкилро ба камобӣ рабт медоданд.
Қаблан масъулини Вазорати энерыии кишвар кишвар ва “Барқи тоҷик” гуфта буданд, ки то нерӯгоҳи “Роғун” пурра ба кор надарояд, “лимит”-и барқ дар кишвар боқӣ мемонад.
Ахиран Эмомалӣ Раҳмон, раисҷумҳури Тоҷикистон дар паёми охири худ ба парлумон гуфт, ки моҳи сентябри соли 2027 чархаи сеюми нерӯгоҳи барқи обии Роғун ба истифода дода мешавад ва баъди ин кишвар ба истиқлоли энергетикӣ мерасад.
