Соли гузашта мошинҳои барқӣ ё электромобилҳо танҳо 2 дарсад барқи қабулкардаи Шабакаҳои тақсимоти барқро “истеъмол” кардаанд, ки ин ҳаҷм ба гуфтаи масъулин, “ба камбуди нерӯи барқ дар кишвар оварда намерасонад”.
Ҷомӣ Умарзода, намояндаи Шабакаҳои тақсимоти барқ (ШТБ) имрӯз, 3-юми феврал дар нишасти хабарӣ гуфт, ки ин нишондод дар баробари истифодаи нерӯи барқ аз ҷониби аҳолӣ ва дигар истифодабарандагони барқ хеле кам аст.
“Аз 19,9 млрд квт-соат барқи қабулкардаи мо дар соли 2025 ҳамагӣ 2%-и он ба нуқтаҳои барқтаъминкунии мошинҳои барқӣ рост меояд. Ин ба гурӯҳи якум, яъне саноат ва тиҷорат дохил мешавад. Гурӯҳи якум, дар соли гузашта ҳамагӣ 22,2%-и нерӯи барқро истифода кардаанд. Аҳолӣ 67,2%-и нерӯи барқе, ки мо аз ҶСК “Барқи тоҷик” қабул кардаем, истифода кардаанд”,-гуфт Умарзода.
Ба таъкиди номбурда, электромобилҳо танҳо дар соатҳое, ки дар хатҳои барқ сарборӣ нест, нерӯи барқ мегиранд.
“Саҳару бегоҳ ба аҳолӣ барқро медиҳем, ба ҳамин хотир мо гуфтем, ки нуқтаҳои нерудиҳии электромобилҳо дар соатҳои авҷи серборӣ барқро истифода накунанд. Ин ба хотири серборӣ аст, на ба хотири онки мо онҳоро бо барқ таъмин карда натавонем”,-гуфт Ҷомӣ Умарзода.
Ин масъули ШТБ илова кард, ки нархи нерӯи барқ барои электромобилҳоро худи ширкатҳои нерӯдиҳии мошинҳо вобаста аз хидматрасонӣ муайян мекунанд.
Тибқи қарори ҳукумати кишвар, аз 1-уми феврали соли равон бори аввал барои пур кардани барқи электромобилҳо таърифаҳои махсус муайян шуд. Минбаъд барои пур кардани ҳар 1 кВт/соат нерӯи барқи электромобилҳо, нуқтаҳои пуркунандаи барқ 94,65 дирам пардохт мекунанд.
Ёдрас мешавем, ки дар Тоҷикистон ба мошинҳои барқӣ низ аз моҳи ноябри соли гузашта дастрасӣ ба барқро маҳдуд карданд. Шабакаҳои тақсимоти барқ бо қабули қарори дахлдор ба филиалҳои худ дастур дод, ки барқи нуқтаҳои нерӯдиҳӣ дар соатҳои авҷи сарборӣ қатъ карда шавад.
Дар ин санад ишора мешавад, ки барқи “ҳамаи нуқтаҳои нерӯдиҳӣ (EV charging stations) бояд аз соати 18:00 то 22:00 шаб қатъ карда шавад”.
Дар пайи ин ронандаҳои мошинҳои барқии таксӣ дар Душанбе аз навбатпоии зиёд, набудани барқ дар нуқтаҳои нерӯдиҳӣ шикоят намуда, нигаронӣ карданд, ин раванд ба норасоии таксиҳо дар пойтахт оварда расонидааст.
Тибқи маълумоти расмӣ, дар ҷумҳурӣ айни замон ҳудуди 40 ҳазор электромобил ба қайд гирифта шудааст.
Дар Тоҷикистон ҳамасола аз охири тирамоҳ то нимаи баҳор маҳдудияти нерӯи барқ ҷорӣ мешавад. Ду соли охир он дар нимаи дуввуми моҳи сентябр оғоз мешавад.
