Рӯзи 14-уми феврал Эмомалӣ Раҳмон, раисҷумҳури Тоҷикистон бо Жоу (Тсзоу) Ҷиайи, раҳбари Бонки осиёии сармоягузориҳои инфрасохторӣ (БОСИ) дидору гуфтугӯ кардааст. Дар ин мулоқот, ки ба иттилои расмӣ, дар Душанбе сурат гирифтааст, аз ҷумла, раванди татбиқи лоиҳаи сохтмони нерӯгоҳи “Роғун” ва идомаи таҷдиди нерӯгоҳи “Норак” баррасӣ шудааст.
Хадамоти матбуоти раисҷумҳур гуфтааст, ки дар дидори ҷонибҳо дурнамои густариши ҳамкорӣ дар соҳаҳои энерҷӣ, инфрасохтори нақлиётӣ ва шаҳрӣ, идоракунии захираҳои об, мутобиқшавӣ ба тағйирёбии иқлим, рақамикунӣ ва баланд бардоштани самароварии энергетикӣ низ мавриди баррасӣ қарор гирифтааст.
“Ҷалби маблағгузории дарозмуддат, такмили механизмҳои татбиқи лоиҳаҳо ва таҳкими иқтидори институтсионалӣ зарур дониста шуд”, – омадааст дар хабари расмӣ.
Ба гуфтаи манбаъ, БОСИ “яке аз шарикони муҳими Тоҷикистон дар самти ташаккули инфрасохтори муосир” ва иқтисоди “сабз” мебошад.
Пас аз мулоқот хонум Ҷиайи ба хабарнигорон гуфтааст, ки Бонки осиёии сармоягузориҳои инфрасохторӣ барномаҳои миллӣ ва минтақавии рушди Тоҷикистонро дастгирӣ карда, мехоҳад дар татбиқи лоиҳаҳои афзалиятнок саҳмгузор бошад.
Ҳамчунин ӯ таъкид кардааст, ки БОСИ омода аст ҳамкориро дар соҳаҳои калидӣ, аз ҷумла таъмини амнияти энергетикӣ, пайвастагии инфрасохтории минтақавӣ, идоракунии захираҳои об ва рушди инфрасохтори шаҳрӣ ба манфиати аҳолӣ густариш диҳад.
Ба навиштаи хабаргузории давлатии “Ховар” хонум Ҷиайи нақша дорад аз майдони сохтмони НБО-и Роғун боздид намояд, то аз рафти татбиқи лоиҳа аз наздик шинос шуда, ҳамзамон имкониятҳои роҳандозии лоиҳаҳои нави инфрасохториро дар ҳамкорӣ бо ҷониби Тоҷикистон баррасӣ кунад.
