Душанбе. 6-уми август. ОИ «Азия-Плюс» – Чанде қабл дар шаҳри Душанбе гуфтушуниди ҳайати Бонки ҷаҳонӣ таҳти сарварии намояндаи доимии бонк дар Тоҷикистон Кяра Бронка бо намояндагони бахши иқтисоди ҳукумати ҶТ баргузор шуд.
Чӣ тавре ки ба ОИ «Азия-Плюс» аз Вазорати молияи ҶТ иттилоъ доданд, мулоқот ҷиҳати баррасии лоиҳаи Стратегияи мусоидат ба Тоҷикистон аз ҷониби Бонки ҷаҳонӣ дар муддати се соли оянда бо назардошти самтҳои афзалиятнок дар Стратегияи коҳиши сатҳи камбизоатӣ ва Стратегияии Милли рушд сурат гирифт. «Ҷонибҳо атрофи масъалаи зарурати сабук кардани таъсири манфии бӯҳрони молӣ ба ҷумҳурӣ табодули афкор намуданд», – таъкид сохтанд дар вазорат.
Бино ба иттилои манбаъ, дар мулоқот аз ҷониби Тоҷикистон сармушовири президенти ҶТ оид ба сиёсати иқтисодӣ Неъматҷон Бӯриев, вазири молияи ҶТ Сафаралӣ Наҷмиддинов, вазири меҳнат ва ҳифзи иҷтимоии аҳолии кишвар Шукурҷон Зуҳуров, муовини вазири рушди иқтисод ва савдо Умеди Давлатзод ва дигар роҳбарони вазорату идораҳои бахши иқтисодии ҷумҳурӣ ширкат варзиданд.
