Душанбе. 6-уми июн. «Азия-Плюс» — | Ҳайати парлумонии Тоҷикистон таҳти сарварии раиси палатаи поёнии парлумони ҷумҳурӣ Шукурҷон Зуҳуров озими шаҳри Сеул гардид.
Тавре ба ОИ «Азия-Плюс» котиби матбуотии Маҷлиси намояндагони Маҷлиси Олии ҷумҳурӣ Муҳаммадато Султонов хабар дод, сафари мазкури ҳайати Тоҷикистон бо даъвати раиси Ассамблеяи миллии Ҷумҳурии Корея Пак Хи Та сурат гирифта, дар ҷараёни сафар дидори ҳайат бо ӯ ва ҳамчунин роҳбари Гурӯҳи парлумонии дӯстии Тоҷикистону Ҷумҳурии Корея Ким Янг Хван, вазири умури хориҷӣ ва савдо Ким Хванг Суан, вазири меҳнат ва шуғли аҳолии ин кишвар Ли Чай Пил баргузор хоҳад шуд.
Ба қавли М.Султонов, пагоҳ дар шаҳри Сеул Шукурҷон Зуҳуров бо донишҷӯёни тоҷик, ки дар муассисаҳои таълимии Ҷумҳурии Корея таҳсил мекунанд, мулоқот хоҳад орост. «Дар ҷараёни сафар ҳайати Тоҷикистон аз корхонаи истеҳсоли автомобилҳои «GM»-и воқеъ дар шаҳри Бупин, ширкати коркарди партовҳо ва Пажӯҳишгоҳи миллии улуми истеҳсолии ин кишвар низ боздид карда, бо фаъолияти онҳо аз наздик ошно мегардад», – афзуд номбурда.
