Душанбе. 20-уми июл. «Азия-Плюс» — | Кормандони милисае, ки нисбаташон оид ба далели марги шаҳрванд Сангов парвандаи ҷиноӣ боз гардидааст, дар бораи мувофиқати нопурраи хизматӣ аз ҷониби ВКД огаҳӣ гирифта, ба муовини сардори ШКД-и Сино-1 огоҳии қатъӣ дода шуд, – гуфт зимни нишасти хабарӣ дар робита ба қазияи марги шаҳрванд Сангов вазири корҳои дохилии ҷумҳурӣ Абдураҳим Қаҳҳоров.
Ба гуфтаи Абдураҳим Қаҳҳоров, айни замон ин чораҳои ҳадди ниҳоии маъмурӣ буда, пас аз ҳукми додгоҳ маълум хоҳад шуд, ки минбаъд боз чӣ чораҳое метавон андешид.
Вазир ҳамчунин масъалаи ба мансабҳои баландтар таъин намудани кормандони вазоратро, ки ахиран амали онҳо бинобар ҷой доштани далелҳои марги боздоштшудагон тахминан бар асари истифодаи шиканҷа мавриди интиқоди аҳли ҷомеа карор гирифтааст, шарҳ дод. Ин ҷо сухан сари Анвар Тағоймуродов, собиқ сардори Раёсати мубориза бо ҷинояткории муташаккили ВКД ва Раҳмонқул Давлатов, собиқ сардори ШКД-и ноҳияи Сино-1 меравад, ки чанд моҳ қабл мутаносибан яке муовини вазири корҳои дохилӣ ва дигаре сардори хадамоти амнияти вазорат таъин гардиданд.
«Нисбат ба Давлатов гуфта наметавонам, ки ӯ мансаби баландтареро соҳиб гардида бошад, вале Тағоймуродов бо пешниҳоди ман муовини вазир таъин гардид, – гуфт ӯ дар посух ба суоли хабарнигори ОИ «Азия-Плюс» – Дар фаъолияти ҳамарӯза бо кормандони ҷудогона баъзе ҳодисаҳо рух медиҳанд. Ман масъулиятро барои рафтори кормандонам аз дӯш гирифтанӣ нестам, вале агар барои як ҳодиса маро аз кор озод намоянд, ин нодуруст хоҳад буд. Тағоймуродов чӣ гуноҳ дорад? Гуноҳаш ин аст, ки шуморо ба додгоҳ кашидааст?».
Ёдрас мекунем, ки қазияи Сафаралӣ Сангов, ки дар ҷомеа сарусадои зиёде ба бор овард, моҳи марти соли ҷорӣ ба вуқӯъ пайваст. Пас аз ҳабси дағалона ва рафтори бераҳмона нисбати гумонбаршуда ба муомилоти ғайриқонунии маводи мухаддир Сангов ва овардани ӯ ба бинои ШКД, Сангов ба шӯъбаи эҳёгарии беморхона интиқол дода шуда,
пас аз чанд рӯз ба ҳуш наомад ва ба ҳалокат расид. Хешовандони Сангов мегӯянд, ки ӯ мавриди латукӯб қарор гирифтааст, кормандони ШКД бошад, изҳор мекунанд, ки ӯ худро аз зинапоя ба поин афканда, сарашро ба девор задааст ва худкушӣ кардааст.
Ба туфайли ВАО ва ҷалби созмонҳои байнулмилаливу дифоъ аз ҳуқуқ ин қазия дар ҷомеа вокуниши пурсарусадо ба бор овард. Аз ҷумла, созмони маъруфи байнулмилалии дифоъ аз ҳуқуқи Amnesty International ва Дафтар оид ба дифоъ аз ҳуқуқи инсон ва риояи қонуният дар Тоҷикистон изҳороти муштарак интишор намуда, аз ҳолатҳои қазияи марги Сафаралӣ Сангов изҳори нигаронӣ намуданд.
Қазияи дигари марбут ба Анвар Тағоймуродов баъди чопи мақолаи «Следствие или инквизитсия» (Тафтишот ё шиканҷаву зулм) дар ҳафтаномаи «Азия-Плюс» рӯйи кор омад, ки дар он як қатор ҳолатҳои истифодаи шиканҷа аз ҷониби кормандони Раёсати мубориза бо ҷинояткории муташаккили вилояти Суғд, аз ҷумла ҳолатҳое, ки боиси марг ҳам шуда буданд, инъикос ёфта буданд.
Пас аз ба табъ расидани мақола Тағоймуродов, ки он замон роҳбарии Раёсати мубориза ьбар зидди ҷинояткории муташаккилро ба ӯҳда дошт, бо талаби рӯёнидани зарар «барои паст задани шаъну эътибор ва мартабаи корӣ» аз болои ҳафтанома ба додгоҳ шикоят бурд.
Қаҳҳоров бо таваҷҷӯҳ ба ин қазия ҳамчунин гуфт, дар замони ҳодисаҳои дар мақола инъикосшуда (соли 2009) Тағоймуродов роҳбарии ин раёсатро бар дӯш надошт ва аз ин рӯ, сарфи назар аз собит гардидан ё нагардидани далелҳо, ҳеҷ масъулияте «ҳатто маънавӣ» ҳам барои он амалҳо надорад. Ӯ дар идома афзуд, Тағоймуродов барои он ба додгоҳ шикоят бурдааст, ки дар замони чопи мақола ҳамчун роҳбари раёсати мазкур ифои вазифа мекард.
