Душанбе. 25-уми июл. «Азия-Плюс» — | Ахири ҳафтаи гузашта мулоқоти Вазири корҳои хориҷии Ҷумҳурии Тоҷикистон Ҳамрохон Зарифӣ бо Сафири Фавқулода ва Мухтори Штатҳои Муттаҳидаи Америка дар Ҷумҳурии Тоҷикистон Кен Гросс ва сафири Шоҳигарии Муттаҳидаи Британияи Кабир ва Ирландияи Шимолӣ Тревор Мур баргузор гардид.
Тавре аз департаменти иттилооти Вазорати корҳои хориҷии ҷумҳурӣ хабар доданд, дар вохӯриҳо тарафайн доираи васеи масъалаҳо, аз ҷумла муносибатҳои дуҷониба байни Тоҷикистон ва ШМА, вазъ дар Афғонистон ва ҳамкорӣ дар чорчӯбаи амалиётҳои зиддитеррористӣ дар Афғонистон, дигар ҳамкориҳои минтақавӣ ва соири масъалаҳои мавриди эҳтимоми муштаракро муҳокима намуданд.
