Ташкилоти Фокус Кӯмаки башардӯстона дар Тоҷикистон ба наҷотдиҳандагони тоҷик дар Вилояти Мухтори Кӯҳистони Бадахшон техникаву дастгоҳҳои ҷустуҷӯйиву садамавӣ ва таҷҳизоти наҷотдиҳӣ тақдим кард.
Тавре ба ОИ «Азия-Плюс» аз ташкилоти FOCUS дар Тоҷикистон иттилоъ доданд, дар маросими супурдани техникаву таҷҳизот раиси Кумитаи ҳолатҳои фавқулодда ва мудофиаи граждании Тоҷикистон генерал-майор Ҳайбулло Латифов зикр кард, ки ин техникаву таҷҳизот имконоти кумитаро дар вокуниши саривақтӣ ва пурсамар ба бартараф сохтани офатҳои табиӣ ба таври назаррас афзун месозад.
Ӯ ба намояндагони ташкилот изҳори миннатдорӣ намуда, сатҳи робитаву ҳамкории дуҷонибаро қаноатбахш арзёбӣ намуд.
