Рӯзи 21 ноябри 2011 иҷлоси умумии Маҷмаи Умумии СММ баргузор шуд, ки дар он лоиҳаи қатънома таҳти унвони «Вазъият дар Афғонистон» бо иттифоқи оро қабул гардид. Тоҷикистон, чун анъана, ба рӯйхати бониёни лоиҳаи қатънома ҳамроҳ шуд.
Дар қатъномаи мазкур тааҳҳуди ҷомеаи байналмилалӣ дар мавриди барқарор намудани сулҳу субот дар Афғонистон ва бозсозии он кишвар таъйид гардида, аз барномаи ҳукумати кишвар дар мавриди марҳала ба марҳала ба афғонҳо интиқол додани масъулият дар соҳаи амният истиқбол ва авз раванди мусолиҳа ва ҳамгиройӣ дар Афғонистон ҷонибдорӣ карда мешавад.
Гузашта аз ин, қатъномаи Маҷмаи Умумӣ ба эҳтиром намудани ҳуқуқи инсон ва озодиҳои бунёдӣ дар Афғонистон даъват мекунад; зарурати густариш додани ҳамкории байналмилалӣ ва минтақавиро бо Афғонистон дар мубориза бо истеҳсол ва қочоқи маводди мухаддир таъкид менамояд; дар мавриди мавҷуд будани талафоти зиёд дар байни мардуми осоишта изҳори нигаронӣ мекунад.
Дар қатънома ҳангоми баррасии масъалаи ҳамкории минтақавӣ ба мулоқоти чорҷонибаи сарони давлатҳои Афғонистон, Покистон, Тоҷикистон ва Русия ва Панҷумин конфронси ҳамкории иқтисодии минтақавӣ оид ба Афғонистон (RECСA V), ки 26-27 марти 2012 дар Душанбе баргузор хоҳад шуд, ишора рафтааст.
Пеш аз қабул шудани лоиҳаи қатънома мубоҳисаҳо сурат гирифтанд, ки дар он дар қатори намояндагони Олмон, Афғонистон, Иттиҳоди Аврупо, Беларус (аз номи Созмони Аҳдномаи амнияти дастҷамъӣ), Испания, Италия, Австралия, Амороти Муттаҳидаи Араб, Малайзия, Покистон, Эрон, Россия, Ҳиндустон, Кореяи Ҷанубӣ, Британияи Кабир, ШМА, Туркия ва Япония ҷониби Тоҷикистон низ иштирок намуд.
Дар суханронии худ ҳайати кишвар саҳми Тоҷикистон дар барқарорсозии Афғонистон ва аҳамияти амалӣ намудани лоиҳаҳо дар соҳаҳои барои он кишвар ва минтақа авлавиятнокро таъкид сохт.
Намояндаи доимии Тоҷимкистон дар СММ Сироҷиддин Аслов изҳор кард, ки Тоҷикистон ба изҳороти Белорус, ки аз номи Созмони аҳдномаи амнияти дастаҷамъӣ пешниҳод гардидааст, ҳамроҳ мешавад.
Намояндаи доимиии ҶТ дар СММ таъкид кард, ки Тоҷикистон ба вазъи Афғонистон бетараф буда наметавонад ва ҳар ду кишварҳои ҳамсоя дар таҳкими муносибатҳои минбаъда, густариши ҳамкориҳои мутақобилан судманд дар бахшҳои гуногун манфиатдоранд.
«Тоҷикистон аз стратегияи танзими комплексии танзими вазъ ва барқарорсозии иқтисоди Афғонисон пуштибонӣ намуда, дар ин самт ҷалби Афғонистон ба раванди ҳамгиройии минтақавӣ тавассути роҳандозии ҳамкории иқтисодиву тиҷоратӣ бо кишварҳои ҳамсояро муҳим мешуморад», – таъкид кард Аслов.
Номбурда дар суханронии худ аҳамияти бузург доштани лоиҳаи сохтмони хатти интиқоли барқи CASA-1000-ро таъкид сохта, ҳамчунин изҳор кард, ки Тоҷикистон сохтмони лӯлаи интиқоли газ аз Туркманистон тавассути қламрави Афғонистон ба Тоҷикистону Покистонро низ дастгирӣ менамояд.
