Халабони рус Владимир Садовничий, ки аз толори додгоҳ мутобиқи қонуни афв озод карда шуд, пас аз озодӣ дар ҷамъи рӯзноманигорон изҳор кард, ки дар маҷмӯъ аз қарори Ҳайати мушовара оид ба парвандаҳои ҷиноии вилояти Хатлон қаноатманд аст.
«Аз ҳама муҳимаш ин аст, ки айни замон мо озодем», – гуфт халабон. Дар ҳамин ҳол, ӯ аз ихроҷи муҳоҷирони тоҷик аз Русия пас аз содир шудани ҳукм ба онҳо изҳори нигаронӣ кард.
«Мардуми одӣ набояд азият кашад, истирдоди шаҳрвандони тоҷик аз Русия ғайриқонунӣ аст», – мегӯяд халабон. Садовничий ба ҳамаи шахсоне, ки зимни дар маҳбас будан ба онҳо дасти ёрӣ дароз карданду ба озодии онҳо мусоидат намуданд, изҳори миннатдорӣ кард.
«Танҳо пас аз дидор бо мушовири сафорати Русия дар Тоҷикистон Дмитрий Кабаев ман ҳис кардам, ки Русия пуштибони ман аст», – афзуд Садовничий.
Ёдрас мекунем, ки додгоҳи шаҳри Қӯрғонтеппа шаҳрванди Русия, халабони ҳавопаймо Владимир Садовничийро дар даст доштан ба ҷиноёти қочоқ, убури ғайриқонунии марзи давлатии Тоҷикистон ва риоя накардани тартиботи парвозҳои байнулмилалӣ муттаҳам дониста, ба 8,5 соли зиндон маҳкум кард. Маҳз пас аз содир шудани ҳукм муносиботи Тоҷикистону Русия ба сардӣ гароид.
Халабони дигар, шаҳрванди Эстония Алесей Руденко низ ба ҳамин мӯҳлат аз озодӣ маҳрум карда шуд.
Ҳукми мазкур дар ҷомеаи Русия вокунишҳои пурсарусадое ба бор овард. Дар партави он президенти Русия Дмитрий Медведев изҳор дошт, ки Русия низ метавонад нисбат ба Тоҷикистон посухи муносиб андешад. Дар навбати худ, президенти Тоҷикистон Эмомалӣ Раҳмон ҷараёни вазъ атрофи қазияи мазкурро таҳти назорати шахсии худ қарор дод.
