Дар вилояти Суғд мурофиаи судӣ оид ба парвандаи гумонбаршудагон ба қатли ёвари сардори мизи бақайдгирии ҳарбии ҷамоати Чоркӯҳи ноҳияи Исфара Содиқ Ашӯрови 34-сола оғоз гардид
.
Дар курсии айбдорӣ панҷнафар сокинони деҳоти Хоҷа-Алои ҷамоати Чоркӯҳи ноҳияи Исфара ҷавоб мегӯянд. Онҳо дар содир намудани ҷиноят мутобиқи моддаи 104, қ. 2-и КҶ ҶТ (Куштани шахс ва наздикони ӯ вобаста бо фаъолияти хизматӣ ва ё қарзи ҷамъиятиро иҷро кардани ӯ ё дар ҳолати оҷизӣ қарор доштани ӯ, ки барои гунаҳгор аён аст ё бо гурӯҳи шахсон бо маслиҳати пешакӣ) айбдор карда мешаванд.
Ёдрас мекунем, ки 11-уми сентябри соли равон тахминан соатҳои 21:00 дар қаламрави деҳоти Хоҷа-Алои ҷамоати Чоркӯҳи ноҳияи Исфара шахсони номаълум ба сокини 34-солаи маҳалли мазкур, ёвари сардори мизи бақайдгирии ҳарбии ҷамоати Чоркӯҳ Содиқ Ашӯрови 34-сола дарафтоданд. Онҳо бераҳмона ӯро мавриди латукӯб қарор дода, аз ҷойи ҳодиса ғайб заданд. Аз ҷароҳатҳои бардошта Содиқ Ашӯров дар ҷойи ҳодиса ба ҳалокат расид. Тибқи яке аз фарзияҳо, ҳодисаи куштори Ашӯров ба фаъолияти хидматии ӯ рабт дорад.
Бино ба маълумоти Раёсати умури дохилии вилояти Суғд, дар зарфи 11 моҳи соли равон дар қаламрави шаҳру навоҳии вилоят 39 ҳодисаи куштор (ҳамин давраи соли гузашта – 40 ҳодиса) ба қайд гирифта шудааст.
